Uzyndyǵy 2 kılometr kórpe tigip, álemdik rekordqa engen ulytaýlyq quraqshylar Kókmaısada
JEZQAZǴAN.KAZINFORM - Ulytaý oblysynyń Jańaarqa aýdanynda ótip jatqan «Kókmaısa» etnofestıvalinde óńirdiń ismer tiginshileri men quraqshylyq óneriniń sheberleri ázirlegen ulttyq naqyshtaǵy quraq kórpeler, jastyqtar jáne ózge de qolóner týyndylary kópshilik nazaryna usynyldy. Kórme qazaqtyń dástúrli qolóneriniń baı murasyn tanystyryp, festıval qonaqtarynyń erekshe qyzyǵýshylyǵyn týdyrdy.
Aıta ketý kerek, Ulytaý oblysynan 56 tigin sheberi elimizdiń úzdik quraqshylarymen birge Shyǵys Qazaqstan oblysynyń ortalyǵy Óskemen qalasynda ótken «Alaman quraq» jobasynyń IV maýsymyna qatysyp, aýqymdy quraq kórpe tigý jumysyna óz úlesterin qosty.
Nátıjesinde jobaǵa qatysýshylar uzyndyǵy 2 shaqyrymdy quraıtyn quraq kórpe daıyndap, 2026 jyly álemdik rekord ornatty. Bul – qazaqtyń dástúrli qolónerin halyqaralyq deńgeıde tanytqan tarıhı jetistik.
Atalǵan biregeı týyndyny ázirleýge álemniń 8 memleketinen jáne Qazaqstannyń 17 óńirinen kelgen 800-ge jýyq qolónershi jumyldyryldy. Ulytaýlyq sheberler óz jumystarynda óńirge tán tarıhı oıý-órnekterdi, qazaqtyń dástúrli «shyǵys bitpesi» ádisin jáne quraq tigýdiń túrli tásilderin sheber úılestirip, ulttyq ónerdiń ómirsheńdigin aıshyqtaı tústi.
Búginde álemdik rekord ıegerleri atanǵan ulytaýlyq quraqshylardyń eńbekteri «Kókmaısa» etnofestıvaliniń sánin keltirip, ulttyq qundylyqtardy dáripteıtin taǵylymdy kórmeniń mańyzdy bóligine aınaldy.
