Uzynaǵashtan Almatyǵa: Kún saıyn aýyl adamdary jumysqa barýǵa qansha ýaqyt jumsaıdy
ALMATY. KAZINFORM — Almatyǵa alys-jaqyn mańdaǵy aýyldardan kóligimen ne qoǵamdyq kólikpen qatynap jumys isteıtin adamdar az emes. Megapolıske árkim ártúrli jolmen kelse de, báriniń shaǵymy bir, ol — saǵattap ýaqyt alatyn keptelis. Osy oraıda Kazinform tilshisi qala kireberisindegi tańǵy jáne keshki ýaqyttaǵy keptelis máselesimen tanysyp qaıtty.
Polıtsııa departamentiniń málimetine sáıkes, 10 negizgi magıstral boıynsha Almaty aýmaǵyna jumys kúnderi orta eseppen 400 myńnan astam avtomobıl kiredi.
Al oblystan qalaǵa kiretin qosymsha 17 jolmen 300 myńnan astam kólik keledi.
Bul kólikterdiń birin basqaryp, jumys úshin kúndelikti Uzynaǵashtan Almatyǵa jol júretin turǵyndardyń biri — Baýyrjan Turǵynbaev. Ol QTJ «Almaty magıstraldy jeli bólimshesiniń» Almaty elektrmen jabdyqtaý dıstantsııasynda jumys isteıdi. Munda qyzmet etip júrgenine 20 jyldan asqan.
— 2000 jyly Shý qalasynan kelip, aldymen Almaty energetıka kolledjinde «tehnık-elektrık» mamandyǵyn, keıin Qazaq ulttyq agrarlyq ýnıversıtetinde «ınjener-elektrık» mamandyǵyn alyp shyqtym. Qazirgi jumys ornyma 2003 jyly kirdim. Anam da 40 jyldaı temirjolda jumys istegen. Qazir ápkem de osy salada qyzmet etedi. 2014 jyldan bastap departamenttiń ortalyq zerthanasynda jetekshi ınjener bolyp eńbek etemin, — dedi ol.
Baýyrjan Turǵynbaevtyń jumys orny Almaty-1 temirjol vokzalynyń mańynda. Ol munda jetý úshin kúndelikti tańǵy 5.00-5.30 arasynda uıqysynan turyp, 6:00 shamasynda jolǵa shyǵady.
11 qarasha dúısenbi kúni Kazinform tilshisi aıtylǵan azamatpen birge Almatyǵa deıin jol júrip kórdi.
Bul kúni 05:20 shamasynda oıanǵan ol jubaıymen birge 06:10-da úıden shyqty.
Uzynaǵash aýylynyń ishinde birinshi kózge túskeni — taksı ustap jáne avtobýs kútip turǵan adamdardyń kóptigi boldy.
Baýyrjan Serikuly bul aýyl turǵyndary úshin úırenshikti kórinis ekenin aıtady.
— Uzynaǵashtyń teń jartysy qalaǵa baryp jumys isteıdi. Sebebi munda bárine jumys joq. Men ózim kúndelikti 5-ten asa oıanyp, jarty saǵat jolǵa jınalamyn. Sosyn 6-lar shamasynda jumysqa shyǵamyn. Jolǵa eń kem degende 2 saǵat, áıtpese kúndelikti 3 saǵat ketedi, — deıdi turǵyn.
Kólik «Almaty-Bishkek» avtojolyna 06:18-de jetti. Jolda Almaty men Uzynaǵash arasynda jaqynda qatynaı bastaǵan birshama № 245 avtobýsyn baıqadyq.
Qalaǵa barar jolda alǵashqy keptelis Qaskeleń burylysyna kelgende 06:36-da bastaldy.
2gis qosymshasy osy jerden Úlken Almaty aınalma avtomobıl jolyna deıin kólik qozǵalysy qıyndaǵanyn kórsetti.
— «Altyn orda» mańynda kópir men jolaıryqtyń ashylýy máseleni sheshken joq, keptelis oblys jaqqa qaraı yǵysyp ketti. 19-shy shaqyrym burylysynan Almalybaqqa deıin uzyn-sonar kólik kezegi kóbeıdi. Sebebi jol eki-aq jolaq, sony tórteýge deıin kóbeıtý kerek. Onyń ózinde keptelis tolyǵymen ketpeıdi. Biraq qazirgideı kóp ýaqyt almaıtyn bolady. 19-shy shaqyrym jaqta kólik aınalatyn kópir jasaǵan jón, — dep atap ótti júrgizýshi.
Keptelis kezinde joldan shyǵyp, jolsyz jermen shańdata júrgen kólikter de boldy. Tájirıbeli júrgizýshiniń aıtýynsha, mundaı júristi polıtsııa qyzmetkerleri kórgen jaǵdaıda júrgizýshige 50 myń teńgeden astam aıyppul salynady.
Degenmen kepteliste turyp Almaty óńiriniń júrgizýshilerine tán jaqsy ádetke de kózimiz tústi. Kólik ıeleri uzaq ýaqyt qımylsyz turǵanyna qaramastan aldymen polıtsııa kóligine, keıin jedel járdem kóligine ashyla jol berdi.
Biz keptelisten shyǵa bergende polıtsııa men medıtsına qyzmetkerleriniń qaıda asyqqany belgili boldy. Abaı aýylyna aparatyn Abaı kóshesine jetpeı jeńil kólik qorshaýǵa soǵylypty.
— Jolda kólik apaty bolyp, keptelis kúsheıip, qansha erte shyqsań da jumysqa keshigip qalatyn kezder bolady. Ondaı kezde men jumysqa habarlasyp, keshigip jatqanymdy eskertemin. Biraq kóbine ýaqtyly baramyn. Qar men jańbyr jaýǵan kezde qala ishinde de, syrtynda da qozǵalys qıyndaıdy. Jolym taǵy jarty saǵatqa uzarady, — dep atap ótti keıipkerimiz.
Úlken Almaty aınalma avtomobıl jolyn ótkennen keıin shaǵyn keptelister «Asyl arman» turǵyn úı kesheni jáne «Altyn orda» bazarynyń mańynda jáne Raıymbek kóshesiniń boıymen Momyshuly kóshesine deıin ár tusta boldy.
Qalaǵa bir saǵat keptelisten keıin jetken keıipker 07:48-de jubaıyn Baýyrjan Momyshuly metro beketinen qaldyrdy. Ári qaraı ol Momyshuly kóshesimen tómen qaraı túsip, Úlken Almaty jolynyń boıymen Soltústik aınalma jolyna shyǵyp, 08:51-de jumysqa jetti.
— Dúısenbi kúni jumysqa jetý jeńildeý bolady. Sebebi bazar jumys istemeıdi. Al seısenbiden jumaǵa deıin keptelis kóbeıedi. Sondaı-aq juma kúni keshke Almatyda oblysqa qaıtý qıyndaıdy. Sebebi kólik te, adam da kóp bolady. Ondaı kezde qalaǵa kóshýdi oılap ketemin, — deıdi ol.
Al keshki saǵat 18:07-de Uzynaǵash turǵyny úıine qaraı jolǵa shyqty. Qaıtar jolda «Aqkent» TÚK pen Qalqaman aıaldamasy arasynda, «Aport» oıyn-saýyq kesheninen «Altyn orda» bazarynan ótkenshe jáne 19-shy shaqyrym burylysynan Almalybaq aýylyna deıin keptelis boldy.
Baýyrjan Turǵynbaev keshke 20:49-da úıine jetti.
Onyń Almatydaǵy jumys orny men Uzynaǵash aýylynyń arasy — 55-57 shaqyrym. Aıtýynsha, orta eseppen bir aptaǵa 60-65 lıtr janarmaı ketedi, oǵan 14-16 myń teńge jumsaıdy.
Eske salaıyq, buǵan deıin QazAvtoJol kompanııasynyń Altyn orda mańyndaǵy keptelis máselesin qalaı sheshetinin jazǵanbyz.
