«Úzilmegen úmit» qazaqstandyq fılmi Halyqaralyq festıvalde bas júlde aldy
ASTANA. QazAqparat - QR Mádenıet jáne sport mınıstrliginiń tapsyrysy boıynsha «Tanaris Production» kınokompanııasy túsirgen «Úzilmegen úmit» kórkem fılmi Reseıde ótken «Svet mırý» kınofestıvalinde bas júldeni jeńip aldy, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
«Úzilmegen úmit» fılminiń rejısserleri - Serik Ábishev jáne Rýslan Magomadov.
Atalǵan fılmdi halyqaralyq kınofestıvalderde kórsetip, nasıhattaýdy Sh.Aımanov atyndaǵy «Qazaqfılm» AQ júzege asyryp otyr.
«Bizdiń fılmimizge joǵary baǵa bergen festıvalge jáne onyń qazylar alqasyna alǵysym sheksiz. Fılmniń teń rejısseri Rýslan Magomadovpen, sondaı-aq kartınanyń túsirý tobymen birlesip meıirimge toly, adamdardyń júrekterine jylý uıalatyp, kóńilderin nurlandyratyn fılm túsirýge tyrystyq», - dedi rejısser Serik Ábishev.
Fılmdegi basty rólderdi Almaty jáne Almaty oblysy balalar úıiniń tárbıelenýshileri, sonymen qatar Ońtústik Koreıanyń balalary somdady. Kartınanyń negizgi túsirý jumystary Shyǵys Qazaqstan oblysynda ótken. Fılmniń mýzykasyn elimizdiń tanymal kompozıtory Qýat Shildebaev jazǵan. Al, fılmge mýzyka jazý barysynda Batyrhan Shúkenovtiń saksofonmen oryndaǵan ımprovızatsııasy negiz bolǵan.
Aıta ketsek, atalǵan fılm eń alǵash Germanııada ótken 64-shi Mangeım-Haıdelberg halyqaralyq kınofestıvaliniń negizgi baıqaýynda kórsetilgen bolatyn. 2016 jyly fılmde basty róldi somdaǵan jas akter Amangeldi Qusaıynov Halyqaralyq «KınoMalyShok» kınofestıvalinde «Úzdik bala róli» júldesimen marapattalǵan.
Fılm týray qysqasha aıta ketsek. Tutqynǵa alynǵan qylmysker áskerılerdiń baqylaýymen Koreıadan Eýropaǵa ushyp bara jatqan sátinde, ushaq Qazaqstannyń bir qalashyǵyna qonýǵa májbúr bolady. Osylaısha, temir tordan talaı márte qashyp ketpek bolǵan basty keıipker taǵdyrdyń salýymen balalyq shaǵyn ótkizgen balalar úıine qaıta oralady.
Túrli ult ókilderinen quralǵan fılmniń keıipkerleri til tabysa almasa da, bir-biriniń júrekterine meıirim shapaǵatyn tógip, kórermenderdi adamdar arasyndaǵy adamgershilik, mahabbat pen dostyq sezimderin baǵalaı bilýge shaqyrady.
