Úzilgen ánurandy oryndaǵan sportshylardy jankúıerleri kútip aldy
NUR-SULTAN. QazAqparat – Úndistannyń Bengalýrý qalasynda sý sporty boıynsha Azııa chempıonatyna qatysqan qazaqstandyq sportshylar elge keldi, dep habarlaıdy QazAqparat tilshisi.
Olardyń arasynda tehnıkalyq aqaýdan úzilip qalǵan ánurandy oryndap shyqqan qyzdar da bar. Olardy kútip alý úshin belsendi jankúıerler áýejaıǵa jınaldy.
«Sportshy qyzdardyń úzilgen ánurandy jalǵap, birge shyrqaýy áleýmettik jelide tarap, kópshiliktiń rızashylyǵyn týdyrǵan edi. Bul jastardyń memlekettik rámizderdi bilip qana qoımaı, shet elde mereıin tasytyp, úlgi kórsetti. Jastardy otansúıgishtikke tárbıeleý maqsatynda sportshylardy kútip alýǵa arnaıy keldik. Qyzdar elden jyraqta el namysyn qorǵaǵany úshin «Jas otan» tarapynan alǵys hatpen jáne syı-syıapatpen marapattalady», - dedi «Jas Otan» jastar qanatynyń tóraǵasy Dáýlet Káribek áýejaıda.
Sonymen birge, QR Mádenıet jáne sport mınıstrligi Sport jáne dene tárbıesi komıtetiniń tóraǵasy Serik Sápıev sportshy qyzdarǵa alǵys aıtty.«Mádenıet jáne sport mınıstrligi atynan sizderge úlken alǵys aıtamyn. Jaraısyzdar! Sportta mundaı jaǵdaılar bolyp turady, sizder ánurandy sońyna deıin aıtyp, durys qadam jasadyńyzdar. Menińshe, mundaı jaǵdaıǵa ún qatyp, sol jerdegi uıymdastyrýshylarǵa aıtý qajet. Osy qalyptan tanbaı, eńbektene berińizder. Rejımdi buzbaýlaryńyzdy tileımin. Demalýǵa bolady, biraq sırek demalys bolsyn», - dep keńes berdi S. Sápıev.
Óz kezeginde sý dobynyń sportshylary ánurandy jatqa aıtýdyń óz mindetteri ekenin jetkizdi.
«Árbir sportshy, tipti árbir qazaqstandyq ánurandy jatqa bilýi tıis. Biz de jarystarda ánurandy birge qosylyp shyrqaımyz. Sol kúni de ándetip turǵanbyz. Sondyqtan, onyń orta jolda úzilip qalýy bizdiń eńsemizdi basqan joq. Kerisinshe, bárimiz birge sońyna deıin aıtyp shyqtyq. Keıinirek, áleýmettik jelide dostarymyz, týystarymyz jaza bastady. Bul bizdiń mindetimiz, oǵan tań qalýdyń qajeti joq», - dedi Sý polosy boıynsha Qazaqstannyń jastar quramasynyń kapıtany Anastasııa Kalmatskaıa tilshilerge bergen suhbatynda.
Onyń aıtýynsha, qyzdar birneshe kún dik demalystan keıin Reseıdegi jarysqa barady.
Eske sala ketsek, Úndistannyń Bangalor qalasynda sý dobynan Qazaqstan men Qytaı komandalary arasyndaǵy oıyn aldynda dybystyq jabdyqtyń tehnıkalyq aqaýyna baılanysty QR gımni 8-sekýndta kenetten úzildi. Sol tusta Qazaqstan jasóspirimder quramasy abyrjymaı, óz daýsymen ánurandy sońyna deıin aıtyp shyqty.
Sondaı-aq, jerlesterimiz qytaılyq qarsylasyn 11:10 esebimen jeńgen bolatyn.
Jalpy esepte qazaqstandyq qyzdar komandasy birinshiliktiń qola júldesine qol jetkizdi. Altyndy Japonııa, kúmisti – Ózbekstan quramalary ıelendi.
