Úzilgen ánuran: Jankúıerlerin tebirentken jasóspirim qyzdar elge qashan oralady
NUR-SULTAN. QazAqparat – Úndistannyń Bengalýrý qalasynda sý sporty túrlerinen ótip jatqan jasóspirimder arasyndaǵy Azııa chempıonatyna qatysqan sportshylarymyzdyń alǵashqy legi 2 qazan kúni elge oralady, dep habarlaıdy QazAqparat tilshisi.
Bul týraly QazAqparat tilshisine Sý dobynan ulttyq qurama komandasynyń basshysy Nazıra Shagırova aıtyp berdi.
«Úndistannyń Bengalýrý qalasynda sý sporty túrlerinen jasóspirimder arasyndaǵy Azııa chempıonaty 3 qazanǵa deıin jalǵasady. Alaıda, jarysty aıaqtaǵan qurama músheleriniń aldy 2 qazan kúni elge oralady. Olardyń arasynda jarys barysynda tehnıkalyq aqaý oryn alyp, úzilip qalǵan ánuranymyzdy oryndap shyqqan kishkentaı arýlarymyz da bar», - dep atap ótti ol.
Sondaı-aq, sportshylardyń elimizdiń qaı qalasyna ushyp keletini de naqtylandy.
«Ózderiniń naǵyz patrıot ekenin sózben emes, naqty ispen dáleldep, barsha jankúıerlerdi tebirentken 13 qyzymyz sol alǵashqy lekpen birge 2 qazan kúni, tústen keıin saǵat 16:00 shamasynda elordamyzdaǵy halyqaralyq áýejaıǵa kelip qonady. Qarsy alamyz degen búkil jankúıerlerdi sol kúni qýana-qýana áýejaıda kútemiz», - dedi Nazıra Erikqyzy.
Sonymen qatar, Nazıra Shagırova ár sportshynyń memlekettik ánuranymyzdy jatqa bilýi - olardyń azamattyq boryshy ekenin de tilge tıek etti.
«Bizdiń ár sportshymyz memlekettik ánuranymyzdy azamattyq boryshy retinde jatqa bilýi tıis dep esepteımin. Ózderińiz kórgendeı, tosynnan bolǵan oqıǵaǵa qaramastan qyzdarymyz bir daýystan ánuranymyzdy erkin oryndap shyqty», - dedi ol.
Esterińizge sala keteıik, osyǵan deıin sý dobynan Qazaqstan men Qytaı komandalary arasyndaǵy oıyn aldynda bolǵan jaǵdaı týraly jazǵan bolatynbyz. Dybystyq jabdyqtyń tehnıkalyq aqaýyna baılanysty QR gımni 8-sekýndta kenetten úzilip ketip, sol tusta Qazaqstan jasóspirimder quramasy abyrjymaı, óz daýsymen ánurandy sońyna deıin aıtyp shyqty.
