Ujymdyq shartta jumysshynyń qandaı quqyqtary jazylady
ASTANA. KAZINFORM — Ujymdyq shart jumysshynyń jalaqysy, jumys ýaqyty, demalysy, eńbek qaýipsizdigi jáne áleýmettik kepildikteri sııaqty mańyzdy máselelerdi naqtylap beredi. Qujat eki taraptyń quqyqtary men mindetterin belgilep, eńbek daýlarynyń aldyn alýǵa kómektesedi. Bul týraly Astana qalasynyń ákimdigi málim etti.
Memlekettik eńbek ınspektsııasy komıtetiniń Astana qalasy boıynsha departamentiniń basshysy Erlan Ismaǵulovtyń aıtýynsha, Eńbek kodeksiniń 1-babynyń 79-tarmaǵyna sáıkes, ujymdyq shart — jumys berýshi men jumyskerlerdiń ókilderi arasynda uıymdaǵy áleýmettik-eńbek qatynastaryn retteıtin jazbasha kelisim.
— Eńbek kodeksiniń 10-babyna sáıkes, eńbek qatynastary tek zańnamamen ǵana emes, ujymdyq sharttarmen de retteledi. Bul rette ujymdyq sharttyń erejeleri jumyskerlerdiń jaǵdaıyn eńbek zańnamasynyń normalarymen salystyrǵanda nasharlatpaýy tıis. Ujymdyq shart jasasýdyń quqyqtyq negizderi QR Eńbek kodeksiniń 156 jáne 157-baptarynda aıqyndalǵan. Onda eńbekaqy tóleý, jumys ýaqyty men tynyǵý rejımi, eńbek qaýipsizdigi jáne eńbekti qorǵaý, áleýmettik kepildikter, sondaı-aq qabyldanǵan mindettemelerdiń oryndalýyn baqylaý máseleleri rettelýi múmkin. Saýatty ázirlengen ujymdyq shart áleýmettik áriptestikti nyǵaıtýǵa jáne eńbek janjaldarynyń aldyn alýǵa yqpal etedi. Memlekettik eńbek ınspektsııasynyń derekterine sáıkes, jumyskerlerdiń ótinishterinde eń jıi kezdesetin máseleler — eńbekaqy tóleý, eńbek jaǵdaılaryn ózgertý, jumys ýaqyty rejımi, demalys berý jáne eńbek qaýipsizdigi talaptarynyń saqtalýy. Kóptegen jaǵdaıda mundaı daýlardyń sapaly ujymdyq shart bolǵan jaǵdaıda aldyn alýǵa bolady, — deıdi departament basshysy.
Eńbek kodeksiniń 158-babyna sáıkes, ujymdyq shart oǵan barlyq tarap qol qoıǵan sátten bastap oryndalýǵa mindetti. Memlekettik eńbek ınspektsııasy ujymdyq-sharttyq retteýdi damytýǵa erekshe nazar aýdarady. Osy baǵytta profılaktıkalyq baqylaý, jumys berýshilerge konsýltatsııalyq kómek kórsetý jáne aqparattyq-túsindirý jumystary júrgizilip jatyr. Máselen, jumys berýshilerdiń birine júrgizilgen jospardan tys tekserý barysynda ujymdyq shartta kózdelgen kóshpeli sıpattaǵy jumyskerlerge ótemaqy tóleý jónindegi mindettemelerdiń oryndalmaǵany anyqtaldy.
Tekserý qorytyndysy boıynsha kásiporyn ákimshilik jaýapkershilikke tartylyp, jumys berýshige anyqtalǵan buzýshylyqtardy joıý týraly oryndaýǵa mindetti nusqama berildi.
— Ujymdyq shart Qazaqstan Respýblıkasynyń Eńbek kodeksinde bekitilgen áleýmettik áriptestik qaǵıdattaryn iske asyrýdyń mańyzdy tetigi bolyp tabylady. Ony tıimdi qoldaný jumyskerlerdiń eńbek quqyqtaryn qorǵaýǵa, jumys berýshilerdiń áleýmettik jaýapkershiligin arttyrýǵa jáne eńbek ujymdaryndaǵy turaqtylyqty nyǵaıtýǵa yqpal etedi. Ujymdyq-sharttyq retteý mádenıetin damytý, jumys berýshiler men jumyskerlerdiń quqyqtyq saýattylyǵyn arttyrý, sondaı-aq eńbek zańnamasy buzýshylyqtarynyń aldyn alý memlekettik eńbek ınspektsııasynyń negizgi mindetteriniń biri bolyp qala beredi, — dep Erlan Ismaǵulov sózin qorytyndylady.
Aıta keteıik, jyl basynan beri óndiriste 727 jumysshy zardap shekti.
