«Úzdikter joq»: Madına Ábilqasymova eldegi bankterdiń qarjylyq damýyna baǵa berdi
ALMATY. KAZINFORM — Almatyda ótip jatqan Central Asia Fintech Summit sammıtinde Qarjy naryǵyn retteý jáne damytý agenttiginiń tóraǵasy Madına Ábilqasymova Qazaqstan bankteriniń shamamen 75%-y jasandy ıntellektti paıdalanatynyn aıtty.
Qarjy naryǵyn retteý jáne damytý agenttiginiń tóraǵasy Madına Ábilqasymovanyń sózinshe, kóp bankter JI qoldanǵanymen, qarjy naryǵynyń tsıfrlyq damý deńgeıi birkelki emes.
2026 jyly agenttik 94 qarjy ınstıtýty, ıaǵnı 23 banktiń, 25 saqtandyrý kompanııasynyń, 31 baǵaly qaǵazdar naryǵyna qatysýshynyń jáne 15 mıkroqarjy uıymynyń tsıfrlyq daıyndyǵyn baǵalady.
Olar ishki protsesterdi tsıfrlandyrý, derekter sapasy, IT ınfraqurylymy, kıberqaýipsizdik, jasandy ıntellektti paıdalaný jáne qyzmetkerlerdiń biliktiligi sııaqty 100-den astam parametr boıynsha baǵalandy.
* Bankter 5 baldan 3,66 ball;
* Saqtandyrý kompanııalary 3,4 ball;
* Mıkroqarjy uıymdary 3,1 ball;
* Baǵaly qaǵazdar naryǵyna qatysýshylar 3,05 ball aldy.
— Sonda bizde áli úzdikter joq pa? — dep surady moderator.
— Úzdikter joq, sebebi bizde IT ınfraqurylymy men jasandy ıntellektke aıtarlyqtaı ınvestıtsııa salatyn iri bankterden bólek, jetkilikti aqsha salmaıtyn ekinshi deńgeıli orta jáne shaǵyn bankter de bar, — dep jaýap berdi Ábilqasymova.
Odan bólek ol tehnologııaǵa salǵan ınvestıtsııanyń ózi tsıfrlandyrýdyń joǵary deńgeıin kórsetpeıtinin aıtyp ótti. Óıtkeni mańyzdysy — tsıfrlyq quraldar men jasandy ıntellekt uıymnyń kúndelikti protsesterine qanshalyqty tereń ıntegratsııalanǵanyn túsiný.
Qarjy naryǵyn retteý jáne damytý agenttigi qarjy sektoryn tsıfrlandyrý jáne jasandy ıntellektti odan ári engizý boıynsha jańa strategııa ázirlep jatyr. Retteýshi organ baǵalaýǵa qatysqan barlyq 94 uıym úshin 1200 naqty sharany anyqtap, jeke josparlar jasady.
— Bul jumysty baqylaý úshin agenttiktiń quramynda Tsıfrlyq transformatsııa keńsesi qurylady. Endi qarjy ınstıtýttarynan tek tehnologııaǵa ınvestıtsııa salý emes, sonymen qatar ony durys qoldaný kútiledi, — dedi ol.
Eske salsaq, JI arqasynda kúdikti tranzaktsııalardy anyqtaý 80 ese jedeldetilgeni aıtyldy.
