Úzdiksiz ınklıýzıvti bilim berýdiń ulttyq ortalyǵy qurylady
QR Oqý-aǵartý mınıstri Ǵanı Beısembaev jumys saparymen Almaty qalasyna bardy. Munda arnaıy jáne ınklıýzıvti bilim berý máseleleri boıynsha ǵylymı qoǵamdastyq pen úkimettik emes uıymdardyń ókilderimen kezdesý ótti, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Kezdesý barysynda 2024 jylǵa arnalǵan jumys jospary týraly QR Oqý-aǵartý mınıstrligi arnaıy jáne ınklıýzıvti bilim departamentiniń dırektory Laýra Býtabaeva aıtyp berdi.
Erekshe bilim berý qajettilikteri bar balalarǵa erte kómek kórsetý maqsatynda búgingi tańda psıhologııalyq-pedagogıkalyq túzetý kabınetteriniń sanyn arttyrý boıynsha jumys júrgizilýde. Qazir elimizde 215 PPTK jumys isteıdi, 2024 jyly qosymsha 9 túzetý kabınetin ashý josparlanýda. Qazirgi kúni mektepterde 700-den astam ınklıýzııany qoldaý kabıneti jumys isteıdi, 2024 jyly olardyń sany taǵy 57 birlikke ulǵaıtylatyn bolady. Sonymen qatar, bıyl 14 PMPK ashý josparlanýda.
Dóńgelek ústelde sóz sóılegen QR Oqý-aǵartý mınıstri Ǵanı Beısembaev ınklıýzıvti bilim berý júıesin damytý memlekettik saıasattyń basym baǵyttarynyń biri ekenin atap ótti. Bul baǵytty damytýdyń mańyzdylyǵyn túsine otyryp 2023 jyldyń jeltoqsanynda mınıstrlik qurylymynda arnaıy jáne ınklıýzıvti bilim departamenti ashyldy.
«Arnaıy bilim ár balamen jeke jumys jasaýdy, ár balaǵa nazar aýdarýdy qajet etedi. Osy maqsatta Ulttyq úzdiksiz ınklıýzıvti bilim berý ortalyǵyn iske qosý josparlanýda. Sonymen qatar biz kadrlardy daıarlaý jáne qaıta daıarlaý máselesin qarastyramyz. Sondyqtan pedagogter oqytatyn joǵary oqý oryndarynyń baǵdarlamalaryna «ınklıýzıvti bilim berý» modýlin qosý josparlanyp, pedagogter úshin biliktilikti arttyrýdyń jańa kýrstary ázirlenýde», — dedi Ǵanı Beısembaev.
Dóńgelek ústel barysynda ǵylymı qoǵamdastyq ókilderi: pedagogıka ǵylymdarynyń doktory, professor Roza Súleımenova, dotsent, pedagogıka jáne psıhologııa ınstıtýtynyń dırektory, pedagogıka ǵylymdarynyń kandıdaty Ǵalııa Abaeva, sondaı-aq úkimettik emes uıymdardyń basshylary sóz sóıledi. Olardyń qatarynda «Dara» qorynyń «Qazaqstanda ınklıýzıvti qoǵam qurý» jobasynyń úılestirýshisi Sáýle Dúısembekova, Bolat Ótemuratov qorynyń dırektory Marat Aıtmaǵambetov te bar.
Shara sońynda QR Oqý-aǵartý mınıstri Ǵanı Beısembaev departament dırektoryna elimizdegi ınklıýzıvti bilim berýdi damytýdyń strategııalyq josparyn ázirleýdi tapsyrdy.
