Úzdik «jasyl» startaptar GCIP jahandyq forýmynda el namysyn qorǵaıdy
ASTANA. KAZINFORM — Astanada GCIP Qazaqstan baǵdarlamasy aıasynda 51 startap irikteldi.
Baǵdarlamanyń jobalyq menedjeri Mádına Qazkenniń aıtýynsha, akseleratsııaǵa daıyndyqtyń alǵashqy kezeńi aıaqtaldy, onyń qorytyndysy boıynsha úzdik komandalar halyqaralyq deńgeıde el namysyn qorǵaıdy.
— GCIP Qazaqstan baǵdarlamasy aıasynda 350 ótinimniń ishinen 51 startap iriktelip alyndy. Qazir irikteýden ótken startap ıeleri ulttyq akademııada 4 kúndik kýrstan ótip jatyr. Keıin qatysýshylar akseleratsııalyq baǵdarlamaǵa qatysady, onyń qorytyndysy boıynsha jartylaı fınalǵa 10 komanda ótedi. Olar óz jobalaryn ulttyq forýmda tanystyrady. Sol jerde 5 jeńimpaz anyqtalady. Jeńimpazdarǵa 3 mıllıon teńgeden qarjylaı syılyq tabystalyp, Qazaqstandy GCIP jahandyq forýmynda tanystyrý múmkindigi beriledi. Sonymen qatar, olar postakseleratsııalyq qoldaýǵa da ıe bolady, bul degenimiz ınvestor tartý, pılottyq jobalardy iske qosý, keńes berý syndy kómek kórsetiledi, — dedi M. Qazken.
Uıymdastyrýshylardyń málimetinshe, bıyl qatysýshylar arasynda aýa sapasyn monıtorıngteý, ekologııalyq bilim berý jáne qus qaldyqtaryn qaıta óńdeý baǵyttaryndaǵy jobalar erekshe kózge tústi.
— Jobalardyń negizgi baǵyttary — qaldyqtardy basqarý, energııa tıimdiligi, taza kólik, «jasyl» qurylys taǵy sol sııaqty. Bıyl sarapshylar Sokolskıı ınstıtýtynyń aýa sapasyna qatysty startapyn, Green Air Academy jobasyn jáne «Kemel» bastamasyn (qus qaldyqtaryn qaıta óńdeý boıynsha) erekshe atap ótti. Bul baǵdarlama Qazaqstanda úshinshi jyl júzege asyrylyp jatyr jáne jyl saıyn ótinimniń sany men sapasynyń artyp kele jatqanyn baıqap otyrmyz. Kóptegen túlek ınvestorlarmen kelisimshart jasap, pılottyq jobalardy Qazaqstanda da, shetelde de iske qosyp jatyr, — dep tolyqtyrdy ol.
Ulttyq akademııaǵa ótken startaptardyń biri — turmystyq sarqyndy sýlardyń tunbasyn ekologııalyq jolmen kádege jaratýǵa baǵyttalǵan joba.
— Meniń jobam sarqyndy sýlardyń tunbasyn joǵary tıimdi mıkroaǵzalar arqyly óńdeýge arnalǵan. Bul óte ózekti másele: mysaly, tek Almatynyń ózinde kún saıyn 30 myń tekshe metrge deıin tunba shyǵady, olar tıisti súzgiden ótpeı tundyrǵyshtarǵa tógiledi. Biz osy oraıda pılottyq jobany qolǵa aldyq, ol bul tunbalardy qaýipsiz túrde tyńaıtqyshqa aınaldyrýǵa bolatynyn kórsetti, ol topyraqta tipti óte talǵampaz ósimdikterdiń ózi tez ósedi. Bolashaqta bul tehnologııany paıdaly qazbalar óndiretin aımaqtardaǵy degradatsııaǵa ushyraǵan jerlerdi qalpyna keltirý úshin qoldanýǵa bolady. Qazaqstanda buǵan uqsas tehnologııa joq. Bizde daıyn sheshim bar, ol kóp shyǵyndy qajet etpeıdi jáne ekologııalyq turǵyda taza. Bizdiń ıdeıaǵa halyqaralyq tájirıbe shabyt berdi, mundaı bıotehnologııalardy Ońtústik Koreıa men Italııada qoldanady, — dedi joba qatysýshysy Janar Myrzaqulova.
Fınaldyq irikteý kúzde ótetin ulttyq forým aıasynda ótedi. Sondaı-aq fınalıster Túrkııada ótetin GCIP jahandyq forýmynda Qazaqstan atynan qatysý múmkindigine ıe bolady. Forýmǵa 16 eldiń ókilderi jınalady.
Birneshe kún buryn elordada jasyl tehnologııa boıynsha GCIP-Kazakhstan ulttyq akademııasynyń jumysy bastalǵany týraly jazǵan edik.