«Úzdik týrıstik aýyl» baıqaýynyń jeńimpazdary anyqtaldy
ASTANA. KAZINFORM - Qazaqstanda aýyl týrızmin damytý jáne shaǵyn eldi mekenderdi derbes týrıstik baǵyt retinde tanytý jumystary júrip jatyr. Kazakhstan Travel Forum 2026 aıasynda «Úzdik týrıstik aýyl» baıqaýynyń jeńimpazdaryn marapattaý rásimi ótti, dep habarlaıdy QR týrızm jáne sport mınıstrliginiń baspasóz qyzmeti.
Marapattardy Týrızm ındýstrııasy komıtetiniń tóraǵasy Nurbol Baıjanov tabystady.
Aýyl týrızmin damytý jergilikti turǵyndardy týrıstik qyzmetke tartýǵa, qosymsha tabys kózderin qalyptastyrýǵa, shaǵyn jáne orta bıznesti qoldaýǵa, sondaı-aq óńirlerdiń tabıǵı jáne mádenı murasyn saqtaýǵa múmkindik beredi. Biregeı tabıǵat, etnografııalyq erekshelikter, qolóner, ulttyq taǵamdar men dástúrli ómir salty jańa týrıstik ónimderdi qalyptastyrýǵa negiz bolady.
«Úzdik týrıstik aýyl» baıqaýyn «Kazakh Tourism» UK» AQ 2025 jyldan bastap ótkizip keledi. 2026 jyly baıqaýǵa alty oblystan ótinim túsip, barlyǵy 13 aýyldyq eldi meken usynyldy.
Іrikteý qorytyndysy boıynsha «Úzdik týrıstik aýyl» mártebesine ıe bolǵandar:
🔹 Jetisý oblysy, Kerbulaq aýdany, Basshı aýyly;
🔹 Soltústik Qazaqstan oblysy, Aıyrtaý aýdany, Imantaý aýyly;
🔹 Shyǵys Qazaqstan oblysy, Katonqaraǵaı aýdany, Berel aýyly;
🔹 Shyǵys Qazaqstan oblysy, Katonqaraǵaı aýdany, Korobıha aýyly;
🔹 Pavlodar oblysy, Baıanaýyl aýdany, Toraıǵyr aýyly.
Jeńimpazdarǵa ózderiniń týrıstik áleýetin odan ári ilgeriletýge múmkindik beriledi. Sondaı-aq qoljetimdi kvotaǵa qaraı olar UN Tourism uıymynyń Best Tourism Villages halyqaralyq bastamasyna qatysýǵa usynylady.
-«Kazakh Tourism» UK» AQ baıqaýǵa qatysýshylar men jeńimpazdarǵa aqparattyq qoldaý kórsetip, aýyldyq aýmaqtardy, jergilikti týrıstik baǵyttar men jańa týrıstik ónimderdi ilgeriletýge yqpal etedi,-delingen habarlamada.
Osyǵan deıin elimizde týrızmdi memlekettik qoldaý baǵytynda qandaı ózgerister engizilip jatqany týraly jazdyq.
