«Úzdik ǵylymı qyzmetker» syılyǵyna konkýrs jarııalandy

ASTANA. KAZINFORM — Ǵylym jáne joǵary bilim mınıstrligi 2024 jylǵa arnalǵan «Úzdik ǵylymı qyzmetker» jyl saıynǵy syılyǵyn alýǵa arnalǵan konkýrs jarııalady. Bul týraly vedomstvonyń baspasóz qyzmeti málim etti.

«Ǵylym jáne tehnologııalyq saıasat týraly» Qazaqstan Respýblıkasy Zańynyń 31-babyna sáıkes ǵylym men tehnıkany damytýǵa úles qosqan ǵalymdardy, ǵylymı uıymdar men joǵary jáne (nemese) joǵary oqý ornynan keıingi bilim berý uıymdarynyń ǵylymı qyzmetkerlerin kótermeleý maqsatynda Qazaqstan Respýblıkasy Ǵylym jáne joǵary bilim mınıstrligi «Úzdik ǵylymı qyzmetker» jyl saıynǵy syılyǵyn alýǵa konkýrs jarııalaıdy.

— Konkýrsqa qatysýshy úshin ótinimder Mınıstrliktiń https://scicontest2024.iac.kz aqparattyq júıesi arqyly elektrondyq formatta habarlandyrý shyqqan kúnnen bastap kúntizbelik 20 kún ishinde qabyldanady, — delingen mınıstrlik habarlamasynda.

Syılyq berýge úmitkerdiń ǵylymı jetistikteri kelesi kórsetkishter boıynsha baǵalanady:

1) Qazaqstan Respýblıkasynda tanylǵan ǵylymı dárejeniń bolýy;

2) ýákiletti organmen berilgen ǵylymı ataǵynyń bolýy;

3) tańdalǵan ǵylymı baǵyt boıynsha ǵylymı jobalar men baǵdarlamalarǵa basshylyq etý;

4) tańdalǵan ǵylymı baǵyt boıynsha ǵylymı nátıjelerdiń bolýy jáne sapasy (maqalalar nemese sholýlar, otandyq jáne sheteldik monografııalar, monografııadaǵy taraý, patentter, engizýler jáne t. b.);

5) tańdaýly ǵylymı baǵyt boıynsha bedeldi halyqaralyq retsenzııalanatyn jýrnaldarda jetekshi sheteldik ǵalymdarmen birlesken avtorlyqpen maqalalardyń bolýy;

6) sońǵy jyly JJOKBU-da keminde bir pándi nemese birneshe pánderdi oqytý;

7) fılosofııa doktory (PhD) nemese sala doktory ǵylymı dárejesin alǵan kadrlardy daıyndaý;

8) óndiriske engizý úshin ǵylymı jáne ǵylymı-tehnıkalyq qyzmettiń rastalǵan nátıjeleri;

9) ǵylymı zertteýlerdiń sapasyn, nátıjeliligin jáne áserin arttyrýǵa baǵyttalǵan qoǵamdyq jumys.

Buǵan deıin Ǵylym jáne joǵary bilim mınıstrligi JOO úzdik oqytýshysy ataǵyna konkýrs jarııalaǵanyn habarlaǵan bolatynbyz.