Úzdik dárigerler men meıirgerlerge 500 AEK syıaqy beriledi
ASTANA. KAZINFORM — Medıtsına qyzmetkeri kúni qarsańynda Densaýlyq saqtaý mınıstrligi medıtsına jáne farmatsevtıka qyzmetkerleriniń arasynda ótetin «Óz kásibiniń úzdigi — 2026» respýblıkalyq konkýrsynyń jeńimpazdaryn anyqtaıdy.
— Qazir respýblıkalyq kezeń ótkizilip jatyr, onyń sheńberinde óńirlik kezeńniń jeńimpazdarynyń arasynan Densaýlyq saqtaý mınıstrliginiń konkýrstyq komıssııasy 17 atalym boıynsha jeńimpazdardy anyqtap, olarǵa 500 AEK mólsherinde aqshalaı syıaqy taǵaıyndaıdy, — delingen habarlamada.
Ártúrli beıindegi jáne qyzmet salalaryndaǵy medıtsına qyzmetkerleri kelesi atalymdar boıynsha marapattalady: «Úzdik statsıonar dárigeri», «Úzdik jedel kómek dárigeri», «Úzdik medıtsınalyq-sanıtarııalyq alǵashqy kómek dárigeri», «Úzdik aýyl dárigeri», «Densaýlyq saqtaý salasyndaǵy úzdik áleýmettik qyzmetker», «Úzdik akýsher», «Úzdik statsıonar meıirgeri», «Úzdik medıtsınalyq-sanıtarııalyq alǵashqy kómek meıirgeri», «Úzdik aýyl meıirgeri», «Úzdik feldsher», «Úzdik medıtsınalyq JOO oqytýshysy», «Úzdik medıtsınalyq kolledj oqytýshysy», «Densaýlyq saqtaý salasyndaǵy úzdik ǵalym», «Úzdik densaýlyq saqtaý menedjeri», «Úzdik sanıtarııalyq-epıdemıologııalyq saraptama mamany», «Úzdik provızor».
Konkýrs medıtsına mamandyqtarynyń bedelin arttyrý, mamandardy yntalandyrý jáne densaýlyq saqtaý salasyndaǵy úzdik praktıkalardy nasıhattaý maqsatynda uıymdastyrylǵan.
Sondaı-aq, 2024 jylǵy sáýirde Memleket basshysy medıtsına qyzmetkerlerin áleýmettik qoldaýdyń birqatar sharalaryn kózdeıtin zańǵa qol qoıǵan bolatyn.
Qabyldanǵan zańǵa sáıkes, 2025 jyldyń qorytyndysy boıynsha óńirlerge jumysqa barǵan 1760 dáriger áleýmettik qoldaý sharalaryn paıdalandy, olardyń ishinde asa tapshy mamandyqtar boıynsha 529 dáriger 8,5 mln teńge mólsherinde birjolǵy tólem aldy.
Sonymen qatar, Memleket basshysynyń bastamasymen sońǵy eki jyldyń ishinde alǵash ret úzdik dárigerlerge «Qazaqstannyń eńbek sińirgen dárigeri» qurmetti ataǵy berilip jatyr.
Ótken jyly medıtsına qyzmetkerlerin memlekettik qoldaýdyń jalpy kólemi alǵash ret 4,5 mlrd teńgeden asty, al 2024 jyly bul baǵytqa 2,2 mlrd teńge bólingen bolatyn.
Buǵan deıin Kókshetaýda 600-ge jýyq medıtsına qyzmetkeri jalaqylarynyń keshikkenine shaǵymdanǵanyn jazǵan edik.
