Úzdik áleýmettik qyzmetker baıqaýyna qatysýǵa 500-den asa ótinim tústi
ASTANA. KAZNFORM — Respýblıkalyq «Áleýmettik qorǵaý júıesiniń úzdik qyzmetkeri jáne úzdik áleýmettik joba» konkýrsyna qatysýǵa búgingi kúnge deıin 509 ótinim kelip tústi, ótinimderdi qabyldaý qyrkúıek aıynyń sońyna deıin jalǵasady, dep habarlaıdy Eńbekmıni.
— Eń kóp ótinim «Úıde qyzmet kórsetý uıymynyń úzdik áleýmettik qyzmetkeri» nomınatsııasy boıynsha — 196. Qazirgi tańda konkýrsqa eń belsendi qatysýshylar — 65 ótinim joldaǵan Batys Qazaqstan oblysynyń úmitkerleri. QR Eńbek jáne halyqty áleýmettik qorǵaý mınıstrligi bastamashy bolǵan bul konkýrs áleýmettik sala mamandarynyń belsendiligin jáne ınnovatsııalyq bastamalaryn anyqtap, kótermeleýdi, sondaı-aq olardyń kásibı bedelin arttyrýdy maqsat etedi, — delingen habarlamada.
Vedomstvo málimetinshe, áleýmettik qyzmetker mamandyǵy — qoǵamdaǵy eń izgi ári mańyzy zor mamandyqtardyń biri. Bul sala mamandary kún saıyn ómirdiń qıyn jaǵdaıyna tap bolǵan jandarǵa kómek kórsetedi: jalǵyzbasty qarttar men múgedektigi bar adamdarǵa úıde qyzmet kórsetedi, otbasylarǵa qoldaý bildiredi, arnaıy áleýmettik qyzmetter kórsetetin ortalyqtarda jumys isteıdi, eldiń ál-aýqaty úshin baǵa jetpes úles qosady. Elimizde jarııalanǵan Eńbek adamy jyly aıasynda bul konkýrs áleýmettik qyzmetkerlerdiń qoǵamdaǵy eńbeginiń mańyzdylyǵyn aıqyndap, olardyń janqııarlyq qyzmetine qoǵam nazaryn aýdarýdy kózdeıdi.
Ótinimder www.qamqor.enbek.kz onlaın platformasy arqyly qabyldanyp jatyr jáne aǵymdaǵy jyldyń 30 qyrkúıegine deıin jalǵasady. Búgingi kúni ótinimder kelesi nomınatsııalar boıynsha bólindi:
- «Úıde qyzmet kórsetý uıymynyń úzdik áleýmettik jumyskeri» — 196 ótinim;
- «Arnaýly áleýmettik qyzmetter kórsetý ortalyǵynyń úzdik áleýmettik jumyskeri» — 115 ótinim;
- «Eńbek utqyrlyǵy ortalyǵynyń (mansap ortalyǵynyń) úzdik qyzmetkeri» — 104 ótinim;
- «Úzdik áleýmettik joba» — 32 ótinim;
- «Úzdik áleýmettik pedagog» — 23 ótinim;
- «Úzdik memlekettik áleýmettik ınspektor» — 22 ótinim;
- «Medıtsınalyq-áleýmettik saraptama salasynyń úzdik qyzmetkeri» — 17 ótinim.
Konkýrs eki kezeńde ótkiziledi: óńirlik jáne respýblıkalyq. Óńirlik irikteý aıaqtalǵannan keıin, aǵymdaǵy jyldyń 1-5 qazan aralyǵynda onlaın-platformada respýblıkalyq kezeńge ótken nomınanttar úshin ashyq halyqtyq onlaın-daýys berý ótedi.
Respýblıkalyq kezeńdegi ádilqazylar alqasynyń quramyna QR Parlamenti Májilisiniń depýtattary, belgili qoǵam qaıratkerleri jáne áleýmettik sala sarapshylary enedi. Bul — protsestiń ashyqtyǵy men ádilettiligin qamtamasyz etý maqsatynda qolǵa alynǵan shara.
Jeńimpazdardy marapattaý saltanaty 24 qazanda, Áleýmettik qorǵaý júıesi qyzmetkerleri kúni qarsańynda Astana qalasynda ótedi.
Buǵan deıin Eńbek jáne halyqty áleýmettik qorǵaý mınıstrligi jańa jumys kestesine kóshkenin jazǵanbyz.