Úzdik jetistikke jetkizgen úsh jeńis: «Astana» Oman týrynda alǵa shyqty
ASTANA. QazAqparat - «Astana» velokomandasy úshin Oman týry óte tabysty aıaqtaldy. Alekseı Lýtsenko bas klassıfıkatsııanyń qorytyndysy boıynsha jeńiske jetse, Mıgel Anhel Lopes jalpy esepte ekinshi orynǵa taban tirep, qazaqstandyq komandany alǵa shyǵardy, dep habarlaıdy «QazAqparat» HAA tilshisi.
Aıta keterligi, Oman týry - 2018 jarysynda ekinshi oryn alǵan Mıgel Anhel Lopes eń úzdik jas shabandoz atandy.
Saıystyń 6-shy sheshýshi kezeńi 135,5 shaqyrym jolǵa sozylǵan. Qashyqtyqty baǵyndyrý kezinde «Astana» tolyǵymen jarys jolyn óz baqylaýyna aldy.
Aqtyq sprıntte «Astananyń» shabandozy, tórtinshi kezeńniń jeńimpazy Magnýs Kort Aleksandr Krıstoftyń (UAE Team Emirates), Braıan Kokar (Team Europcar) men Djakom Nıtstsolonyń (Leopard Trek) izin ala tórtinshi keldi. Onyń aldynda Lýtsenko kósh bastaǵan saıystyń jalpy esebi aıtarlyqtaı ózgergen joq.
«Maýsymnyń alǵashqy saıysynda top jarǵanymyzǵa qatty qýanyp turmyz. Men osy qysta kóp daıyndalyp, jyldyń basynda úzdik qalypta bolýdy kózdedim. Endi, minekeı, jeńimpaz bolyp otyrmyz. Biraq, jyldyń alǵashqy jartysynda meniń basty maqsatym klassıkalyq jarys bolyp qala bermek. Sondyqtan, tabysqa jetýge barymdy salamyn», - deıdi Alekseı Lýtsenko.
Al komandanyń bas menedjeri Aleksandr Vınokýrov «Astananyń» maýsymdy osylaı bastaǵanyna qýanyshty ekenin jetkizdi.
«Komanda alǵashqy jarysta-aq ózin jaqsy kórsetti. Jeńisterimiz ben jetiktikterimiz barshylyq. Biz Omanda birligi myǵym, myqty ári úılesken komandany baıqadyq», - deıdi Aleksandr Vınokýrov.
