Úzdik jas dıplomattar marapattaldy
ASTANA. QazAqparat - QR Syrtqy ister mınıstrligi uıymdastyrǵan «Jas Diplomat» jobasy óz máresine jetti, dep habarlaıdy QazAqparat tilshisi.
Syrtqy ister mınıstrliginiń jobasyna elordanyń 7 mektebinen (№3, №4, №5, №6, №48, №75, №81) 35 oqýshy qatysty. Bolashaq dıplomattar eki aı boıy Brazılııa, Germanııa, Grýzııa, Koreıa, Japonııa, Polsha, Túrkııa memleketteriniń elshi jáne elshilikterimen jumys jasap, atalǵan sala jumysynyń qyr-syrymen tanysty.
Jobanyń búgingi aqtyq synynda oqýshylar BUU modeline sáıkes «Bolashaqtyń energııasy» taqyrybynda otyrys ótkizip, energııa taqyrybyn talqyǵa saldy. ıAǵnı, ár memleket dıplomattary óz elderiniń bolashaqta energııa óndirýge qatysty ustanymdary men jobalaryn usyndy.
«Dıplomattar memlekettiń mańyzdy qyzmetkeriniń biri. Olar óz elderiniń múddesin qorǵap qana qoımaı, sheteldik áriptesterimen tyǵyz qarym-qatynas jasap, yntymaqtastyqta jumys isteı bilýi tıis. Bulaı deıtin sebebim, osy otyrǵan jastar elimizdiń bolashaq dıplomattary», - dedi elimizdiń Syrtqy ister mınıstri Qaırat Ábdirahmanov.
Mınıstr jasóspirimderdi dıplomatııalyq qyzmettegi alǵashqy qadamdarynyń sátti bastalýymen quttyqtap, barlyqtarynyń eńbekterin erekshe baǵalap, marapattady.
«Jobaǵa qatysqanyma qýanyshtymyn, sebebi bolashaq dıplomat retinde ózime qajetti kóptegen dúnıemen tanystym. Naqty aıtqanda, bizdiń komandaǵa Japonııa eli tústi jáne joba barysynda osy eldiń elshiligimen belsendi jumys istedik. Odan bólek, elshilikte ótetin mańyzdy sharalardyń qalaı uıymdastyrylyp, ótetinimen tanystyq», - dedi Astana qalasy №48 lıtseıiniń 9 synyp oqýshysy Aıda Orazhýnova.
Eske salsaq, jas dıplomattarǵa arnalǵan atalǵan joba qazan aıynda bastalǵan bolatyn.
