Úzdik ulandyqtar Almatyda bas qosty

ALMATY. QazAqparat - Búgin Almatydaǵy 5571 áskerı bólimi bazasynda Qazaqsan Respýblıkasy Ulttyq ulany «Ońtústik» óńirlik qolbasshylyǵyna qarasty áskerı bólimder arasynda «Úzdik batalon komandıri», «Úzdik batalon komandıriniń orynbasary», «Úzdik batalonnyń shtab bastyǵy» atty baıqaýdyń ІІ kezeńi bastaldy.

Atalmysh shara Ulttyq ulan ofıtserleriniń áskerı-jaýyngerlik daıarlyǵyn kóterý úshin, sondaı-aq batalon býynyndaǵy sardarlardyń kásibı biliktilikterin joǵarylatý, tájirıbelik bilimderin arttyrý, olardy qyzmettik tapsyrmalardy oryndaýǵa jigerlendirý maqsatynda ótkizilip otyr. Ulandar arasynda úzdikterdi anyqtaý 4 jeltoqsanǵa deıin jalǵasady. Saıysqa qatysýǵa Jambyl, Almaty, Qyzylorda, Ońtústik Qazaqstan oblystarynyń ulandary kelip otyr. Olar memlekettik-quqyqtyq daıyndyq, qyzmettik-jaýyngerlik qoldaný taktıkasy, QR QK basqa da áskerleri men áskerı quramalarynyń Jalpy áskerı jarǵysyn bilýden baq synasady. Sonymen qatar saıysqa qatysýshylar dene daıyndyǵy, ıaǵnı, 100 metrge júgirý, beltemirde tartylý, 3000 metr qashyqtyqqa júgirý syndy normatıvterden synaq tapsyrady. Buǵan qosa, olardy atys daıyndyǵynan synaqtar kútip tur. Saıystyń negizgi talaby - Makarov tapanshasynan №1 atys jattyǵýdan ótý. Jeńimpazdardy marapattaý 5571 áskerı bóliminiń klýbynda erteń ótedi. Óńirlik saıystyń jeńimpazdary Astana qalasynda josparlanǵan aqtyq saıysqa «Ońtústik» qolbasshylyǵynyń namysyn qorǵaýǵa attanbaq.