Úzdik strıtbolshylar Astanada kezdesedi
ASTANA. QazAqparat - Jazda astanalyqtardy keremet sporttyq dýman kútedi. 1-5 maýsymda elordada strıtboldan Álem birinshiligi (FIBA 3h3 U18 World Championships) ótedi. Oǵan 30 astam memlekettiń sportshylary qatyspaq. Oıyndar «Astana Opera» teatry ǵımaratynyń janyndaǵy alańda ótkiziledi, dep habarlady qala ákiminiń baspasóz qyzmeti.
200 astam sportshy kóshe basketbolyn oınaıdy. Jarys barysynda erler men áıelder komandalary tórt topta sheberlik baıqasady. Qazaqstannyń erler quramasy «S» tobynda óner kórsetip, Rýmynııa, Indonezııa, Italııa jáne Qatar komanalarymen kúsh synasatyn bolady. Elimizdiń áıelder quramasy Nıderlandy, AQSh, Italııa jáne Polsha komandalarymen «V» tobynda kezdesedi.
Álem birinshiligin uıymdastyrýshylar - Qazaqstan Strıtbol lıgasy (SLK), QR Ulttyq basketbol federatsııasy jáne FIBA 3h3.
- Kóshe basketboly nemese strıtbol qazirgi zamanǵy qala mádenıetinde - eń demokratııalyq sport, ony jastar oınaıdy. Strıtbol adamdardy biriktirip, olarǵa senim beredi, úlken jetistikterge qol jetkizýge qushtarlyqty oıatady, - deıdi SLK prezıdenti Nurlan Qusaıynov.
Kórermender nazaryna strıtboldan 3h3 formatyndaǵy kezdesýler men oıyn-saýyq baǵdarlamalary usynylmaq. Basketbol men strıtvorkaýttan sheberlik dáristeri ótkiziledi, chırlıderler, breıkdanserler men qala mádenıetiniń basqa da ókilderi óner kórsetpek. Elordada alǵash ret basketbol frıstaıler jáne ushatyn akrobat-basketbolshylar komandalary óz sheberlikterin ortaǵa salady. Ártister qala qonaqtaryn elimizdiń ulttyq erekshelikterimen tanystyrady. Al kishkentaı astanalyqtar úshin arnaıy aımaq uıymdastyrylady.
Aıta keteıik, osy kúnderi buqaralyq týrnırler, sonyń ishinde Astana kýbogy ótkiziledi. Jarystarda 10 jastan asqandardyń barlyǵy baǵyn synaı alady.
Sharalar belgili dıdjeıler hıtteriniń súıemeldeýimen ótkiziledi. Sharanyń ashylýynda qazaqstandyq jáne reseılik juldyzdar óner kórsetedi.
Jarys 1 maýsymda saǵat 13:00 bastalady. Sporttyq dodalardy Kazsport telearnasynan jáne FIBA-nyń Youtube-taǵy resmı kanalynan tikeleı efırden tamashalaýǵa bolady.
