«Úzdik sabaq» baıqaýynyń jeńimpazdary marapattaldy

Elordanyń resmı saıtynyń jazýynsha, is-sharany uıymdastyrýshy  Astana qalasynyń Mádenıet basqarmasy. Baıqaýǵa elordanyń 100  bilim mekemesi qatysty.

Astana qalasy ákiminiń orynbasary Aıda Balaeva óziniń sózinde atap ótkenindeı, is-shara Qazaqstan Respýblıkasy Táýelsizdiginiń 21 jyldyǵyna arnalyp otyr. Basty maqsaty - jas urpaqtyń boıynda patrıotızm rýhyn qalyptastyrý. «Jastar - bizdiń bolashaǵymyz. Sondyqtan, o bastan jetkinshek urpaqtyń  boıynda  otansúıgishtik sezimin darytyp, qazirden bastap olardyń júregine týǵan eline degen sheksiz mahabbatty ornyqtyra bastaý qajet», - dedi  ákimniń orynbasary.

Quramyna qalalyq ákimdiktiń ókilderi, eńbek sińirgen ustazdar, mádenıet qaıratkerileri kirgen baıqaý komıssııasy músheleriniń aıtýynsha,  jeńimpazdardy tańdaý óte qıynǵa soqqan. «Táýelsizdik tiregiń, egemendik eldigiń»  taqyrybyndaǵy barlyq ashyq sabaqtar tartymdy  da  qyzyqty ótken.  Sondyqtan, barlyq qatysýshylar da qala ákimdiginiń Alǵys haty men eskertkish syılyqtaryna,  júldelerine ıe boldy.  Jeńimpazdarǵa 15 atalym boıynsha aqshalaı syılyq berildi.  Gran-prı - bas júlde (Demeýshilerden 100 myń teńge jáne Qazaqstannyń Halyq jazýshysy Ábish Kekilbaevtyń shyǵarmalar  jınaǵy)  eki qatysýshyǵa tapsyryldy. Olar - qaladaǵy  №68  orta  mektep dırektory Naǵashybergen Erdenuly men №54 orta mektep dırektory Gúlbarsha Búrkitbaıqyzy.