Úzdik pedagog: Eń qıyn mamandyq – adam bolý
Aqtóbe oblysy boıynsha Sáýle Úkibaeva, Talǵat Áben, Dámejan Qystaýbaeva, Rıta Aıtjanova Qazaqstandaǵy úzdik pedagogtardyń qataryna qosyldy.
Bilim jáne ǵylymı mınıstri Ashat Aımaǵambetovtyń qolynan medal alǵan Rıta Aıtjanova Alǵa qalasyndaǵy mektepte tarıh páninen sabaq beredi jáne dırektordyń tárbıe isi jónindegi orynbasary.
«№3Alǵa qalalyq qazaq orta mektebinde bilim alyp, 10-11 synypty M.Qusaıynov atyndaǵy daryndy balalarǵa arnalǵan mektep-ınternatta oqydym. 1994 jyly mektepti bitirgen soń Q.Jubanov atyndaǵy Aqtóbe memlekettik ýnıversıtetiniń tarıh fakýltetinde bilim aldym. 1998 jyldyń 1 qyrkúıeginen bastap ózim oqyǵan №3 Alǵa qalalyq qazaq orta mektebinde jumys isteımin. Eńbek ótilim – 23 jyl. Úzdik pedagog ataný úshin irikteýden óttim. Mektepishilik, aýdandyq, oblystyq kezeńderge de ádistemelik quraldarymyz ben jazǵan dúnıelerimizdiń jınaǵan joldadyq. Pándik olımpıadaǵa shákirtterim qatysyp, júldegerler qatarynan kórindi. Bul da muǵalim úshin jetistik», - dedi Rıta Aıtjanova.
Búgingi muǵalim bala kezinde muǵalimge, synyp jetekshisine eliktep ósti. Tek dáris berýi emes, bar bolmysy unady, sóıtip mamandyǵyn tańdady.
«Mektepte de keıbir synypqa birneshe pán tereńdelitilip oqytyldy. Ózim tarıh-geografııany jan-jaqty úıretetin topqa bardym. Sol kezde-aq ýnıversıtettiń oqytýshysynan dáris aldyq, ólketaný murajaıyna baryp, pánge degen qyzyǵýshylyǵymyz arta tústi. Tarıh fakýltetin tańdaýyma osy sebep. Al qazir balalar tárbıesine kóp kóńil bólemin. Byltyr 6-11 tamyz aralyǵynda Túrkistanǵa oqýshylardy aparyp, olardyń tarıhty tanýy úshin jańa ádisti qoldandyq. Baryp, kórgen balanyń oıynda bári saqtalady. Zamandastaryna biz emes, ózderi-aq aıtyp, bárin uǵyndyra alady. Foto, vıdeo materıalymyz da jasaldy. Men bir kezderi ustazyma uqsaǵym kelip, osy joldy tańdadym. Meniń de dál osyndaı shákirtim bar. 2016 jylǵy túgelegim Aqerke Sovet oblystyq olımpıadada júldeger bolyp, tarıh salasynda bilim alyp júr», - dedi ustaz.
Rıta Aıtjanova 2001 jyly turmysqa shyqty. Arada dál 20 jyl ótkende mınıstr Ashat Aımaǵambetovtiń qolynan marapat aldy. Úsh bala tárbıelep otyr. Úlken uly S.Demırel atyndaǵy ýnıversıtette ІT salasynda bilim alady. Ortanshy uly 9 synyp, al kishkentaı qyzy 3 synypta oqıdy.
«Kúıeýim vahtalyq ádispen jumys isteıdi. Meniń jetistigim, onyń qoldaýy, qamqorlyǵy. Biz tańerteńnen keshke deıin mektepte júremiz, tynbaı eńbek etemiz. Balalar qazir basqa, urpaq ózge. Degenmen balaǵa senimdi aqparat aıtyp, naqty jetkize bilseń, bárin qabyldaıdy. Oqýshymen qarym-qatynasta ár ustazdyń óz joly bar. Men eki synypty túlettim. Oqýshylarym habarlasyp, merekede quttyqtap turady. «Eń qıyn mamandyq - adam bolý» dep jıi aıtamyn. Aldymen tárbıe, sodan keıin ǵana bilim», - dedi Rıta Aıtjanova.
Ustaz baǵalaý kezinde 10 baldyq júıeniń tıimdi ekenin aıtty. Bul balanyń taqyrypty túsinip, jan-jaqty zerttegenin nemese qur jattap alǵanyn baǵamdaýǵa múmkindik beredi. Al úı tapsyrmasyn oryndamaıtyn, sabaqqa selsoq oqýshylar derekpen jumys isteıdi. ıAǵnı, mektepte qosymsha dáris alady.
«Qazirgi balalar ashyq, erkin. Óz oıyn erkin aıtady. Keıde baǵytyn jańylystyrý úshin qarsy suraq qoıyp, tyǵyryqqa tireımin. Ol kezde oqyp, zerttep kelgen oqýshy óz sóziniń durys ekenin dáleldeıdi. Ata-analar balasy úshin «jaqsy baǵa» suraǵan emes. Ózim týraly «qatal muǵalim» degenin estımin. Árıne, tártipti, tárbıeni birinshi orynǵa qoıamyn», - dedi Rıta Aıtjanova.
