Úzdik pedagog Beıbit Bıbosynov: Ómirimdi bilikti maman tárbıeleýmen baılanystyryp otyrmyn
Osy aptada Qostanaıda muǵalimderdiń kásibı merekesi qarsańynda «Úzdik pedagog – 2021» respýblıkalyq baıqaýynyń qorytyndysy shyǵaryldy. Bıyl onynshy ret ótip jatqan mereıtoılyq rásim Qazaqstan Táýelsizdiginiń 30 jyldyǵy qarsańynda uıymdastyrylyp, asa kórnekti aǵartýshy, pedagog Ybyraı Altynsarınniń 180 jyldyǵymen tuspa-tus keldi.
29 qyrkúıek kúni elimizdiń túkpir-túkpirinen kelgen 64 muǵalim «Úzdik pedagog-2021» ataǵyna ıe boldy. Pedagogterdiń árqaısysy 1000 AEK kóleminde sertıfıkatpen jáne «Úzdik pedagog» tósbelgisimen marapattaldy. https://kaz.inform.kz/news/kazakstannyn-uzdik-pedagogtary-kostanayda-marapattaldy_a3842698
Olardyń arasynda Nur-Sultan qalasy ákimdigi «Kásiptik-tehnıkalyq kolledj» KMM-niń óndiristik oqytý sheberi Beıbit Bıbosynov ta bar.
Beıbit Dúısenbıuly Batys Qazaqstan oblysy Aqsaı qalasynda kásiptik lıtseıin támamdap, keıin Almatyda joǵary bilim aldy. Almatyda 2011 jyldan bastap úsh jyl qatarynan pedagog bolyp qyzmet etip, keıinnen elordada osy sala boıynsha jumysyn jalǵastyrdy.
«Osy salada qyzmet etip júrgenime 10 jyl boldy. Pedagog bolý ózime unaıdy, ómirimdi osy baǵytpen tyǵyz baılanystyryp otyrmyn. Óndiristik oqytý sheberi retinde stýdentterge tájirıbe júzinde dánekerleý salasyna oqytamyz. Osy oraıda stýdentter qolmen istep, kózben kórip, naqty biliktiligin shyńdaıdy. Jastarǵa teorııalyq bilimimen qatar, tájirıbe júzinde de mańyzdy taqyryptardy meńgerip shyǵýyna kómektesemiz. Óz salamda elektrli dánekerleý apparatymen jik salýdy úıretý kezinde qandaı elektr qýatyn qosý kerek ekenin, qaı metaldy tańdaýdy, elektrodty qosý jáne basqa da qajetti tájirıbelik sıpattaǵy qyr-syrynan tálim beremiz», - dedi B. Bıbosynov.
Onyń aıtýynsha, dánekerleýshi mamandarǵa elimizde suranys joǵary. Bul turǵyda elordadaǵy birqatar óndiristik kásiporyndarda, qurylys nysandarynda osy salanyń mamandaryna qajettilik bar.
«Bizge túrli kásiporyndardaǵy kadr bóliminen habarlasyp, bilikti jastardy jumysqa shaqyryp jatady. Ózimniń ómirimdi pedagog salasymen jalǵastyryp, jaqsy maman tárbıeleýmen baılanystyryp otyrmyn. Saladaǵy jetistigimde zamanaýı tehnologııalarmen sabaq bergenim baǵalandy. Sandyq baǵdarlamamen jabdyqtalǵan apparattardy jetik meńgerip otyrmyz. Osy oraıda bul baǵyttaǵy jumystarym baıqaýdaǵy qazylar alqasyna unady», - dedi Beıbit Bıbosynov.