Úzdik muǵalim - 2021: Ustaz ekenimdi maqtanyshpen aıta alamyn
Bilim kóshin ilgeri jyljytyp, el qatarly eńbek etip otyrǵan ulaǵatty jannyń biri – «Úzdik muǵalim – 2021» tósbelgisiniń ıegeri aqmolalyq ustaz Lázzat Qasqaeva der edik. Ómirlik ustanymy bar ol eńbekke degen qulshynysy men tabandylyǵynyń arqasynda bıik belesterge qol jetkizip otyr, dep habarlaıdy QazAqparat tilshisi.
Lázzat Baıserkeqyzy Jaqsy aýdanyndaǵy jalpy bilim beretin №1 orta mektepte 20 jyldan astam ýaqyt qazaq tili men ádebıeti páninen shákirtterin bilim nárimen sýsyndatyp keledi. Ol oqýshylarynyń boıyna adamgershilik pen jaqsy qasıetterdi sińirgen tamasha pedagog.
Arqalyq pedagogıkalyq ınstıtýtyn támámdaǵan ol Aqmola oblysynyń Jaqsy aýylyndaǵy mektepke muǵalim bolyp jumysqa ornalasady. Pedagogıkalyq mansabyn aýyl mektebinen bastaǵan ol sonda búgingi jan joldasy Bagıdden Birálındi kezdestirip, otbasyn qurady. Mine sodan beri shırek ǵasyrǵa jýyq ýaqyt ótse de ol tańdaǵan jolynan adaspaı, otbasyn uıytyp, shákirtteriniń bilim alýyna atsalysyp keledi.
Lázzat Baıserkeqyzy Almaty oblysy Kegen aýdany Shyǵanaq aýylynda kópbalaly otbasynda dúnıege kelgen. Otbasyndaǵy on balanyń ekeýi Lázzat pen onyń ápkesi Saltanat pedagog mamandyǵyn tańdaıdy. Lázzattyń balalyq armany ustaz bolý edi.
«Men muǵalim bolýdy bala kezimnen armandap óstim. Alǵashqy ustazym Aısulý apaıǵa eliktep, sol kisi sııaqty muǵalim bolýdy maqsat tuttym. Bala - taza paraq sııaqty, ol ósip, eresekterge eliktep, olardan barlyq jaqsy jáne jaman áreketterdi sińiredi. Alǵashqy ustazymnyń qazaq tili men ádebıetinen qalaı oqytqany áli esimde. Meniń ustaz bolýyma túrtki bolǵan sol kisi. Sol balalyq armanym meni adastyrmaı muǵalim mamandyǵyna alyp keldi. Men búgin ustaz ekenimdi maqtanyshpen aıta alamyn. Muǵalim retindegi bizdiń birinshi mindetimiz-sapaly bilim berý jáne oqýshylardyń saýatty, tárbıeli bolyp qalyptasýyna yqpal etý. Sondyqtan, ár sabaqta men balalardyń nazaryn aýdarýǵa, sabaqty qyzyqty etý úshin ártúrli ádisterdi qoldanamyn. Trendte, zamanaýı talaptarǵa saı bolý úshin kóbirek jańa tehnologııalardy qoldaný qajet. Sonymen qatar, kez-kelgen sabaqta shynaıy ómirmen qatar, oqýshylardy qyzyqtyra bilý kerek», - deıdi «Úzdik muǵalim» tósbelgisiniń ıegeri Lázzat Qasqaeva.
Aıta ketsek, Lázzat Baıserkeqyzy jaqynda QR Bilim jáne ǵylym mınıstriniń qatysýymen Qostanaıda ótken ótken konferentsııaǵa qatysyp, elimizdiń úzdik muǵalimderiniń arasynda «Úzdik muǵalim» tósbelgisimen marapattalǵan bolatyn.