«Úzdik muǵalim-2012» baıqaýynyń jeńimpazyna páter berildi
ASTANA. 4 qazan. QazAqparat - Búgin Astanadaǵy Kongress-Holl saraıynda Ustazdar kúnine arnalǵan saltanatty jıyn bolyp ótti. Oǵan Astana qalasynyń ákimi Imanǵalı Tasmaǵambetov pen Qazaqstan Respýblıkasynyń Bilim jáne ǵylym mınıstri Baqytjan Jumaǵulov qatysty.
Kásibı mereke qarsańynda dástúr boıynsha qalalyq bilim júıesiniń úzdik qyzmetkerleri ataldy. QR Bilim jáne ǵylym mınıstri B.Jumaǵulov bıylǵy jyly elordalyq mektepterden 28 muǵalim qatysqan «Úzdik muǵalim-2012» baıqaýynyń júldegerine páter kiltin tabystady. Baıqaýdyń Gran-prı ıegeri Kúlzıpa Qylyshbaeva № 5 gımnazııanyń qazaq tili men ádebıeti pániniń muǵalimi.
Sonymen qatar, QR Bilim jáne ǵylym mınıstri «Qazaqstan Respýblıkasy bilim berý isiniń qurmetti qyzmetkeri» tósbelgisin № 54 mektep-lıtseıdiń muǵalimi Baqyt Túlkibaevaǵa, № 60 mektep-lıtseıdiń muǵalimi Prıadko Stellege tapsyrdy. Sondaı-aq, mınıstr qolynan Y.Altynsarın atyndaǵy medaldi № 50 mektep-lıtseıdiń muǵalimi Rabıǵa Imanqulova, № 36 orta mekteptiń dırektory Vadım Motorın jáne Astana qalasy bilim basqarmasynyń ádisteme kabınetiniń meńgerýshisi Ásııat Qorjyqova aldy.
Bir top ustazdar QR BǴM-niń alǵys hattarymen jáne qurmet gramotalarymen marapattaldy.
Muǵalimderge arnalǵan saltanattyń resmı rásiminen soń shara merekelik kontsertke jalǵasty.
Aıta ketý kerek, osy kúni Astana ákimdiginde I.Tasmaǵambetov elordanyń úzdik bilim mekemelerine nagradalar men júldeler, sondaı-aq, 10 ustazǵa páter kiltin tabystady.
2012-2013 oqý jylynda Astana qalasynda 70 memlekettik mektep jumys isteıdi, olarda 83568 oqýshy bilim alýda.
