«Úzdik memlekettik qyzmetshi» anyqtaldy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasy Qaırat Qojamjarovtyń buıryǵymen Parlament Senatynyń Konstıtýtsııalyq zańnama, sot júıesi jáne quqyq qorǵaý organdary komıtetimen ózara baılanys jasaý bóliminiń meńgerýshisi Rashıd Bekituly Evnıevke «Úzdik memlekettik qyzmetshi» tósbelgisi tabystaldy, dep xabarlaıdy QazAqparat.

Atalmysh tósbelgini Rashıd Evnıevke QR Parlamenti Senatynyń depýtaty Serik Aqylbaı tabys etti. 

Rashıd Bekituly Evnıev 1978 jyly týǵan. Bilimi joǵary. Sh. Ýálıhanov atyndaǵy Kókshetaý ýnıversıtetin, «Ádilet» joǵary quqyq mektebin bitirgen, ekonomıs-menedjer, zańger. Respýblıkanyń Kólik prokýratýrasy organdarynda ártúrli laýazymdarda, Qazaqstan Respýblıkasy Májilisi depýtatynyń kómekshisi, Senat Apparatynyń Konstıtýtsıalyq zańnama, sot júıesi jáne quqyq qorǵaý organdary komıtetimen ózara baılanys jasaý bóliminiń bas konsýltanty, bólim meńgerýshisiniń orynbasary bolyp qyzmet istegen. Mansaptyq jolda úsh medalmen, sonyń ishinde «Eren eńbegi úshin» medalimen marapattalǵan. 

Aıta keteıik, búgin, 23 maýsym - Qazaqstan memlekettik qyzmetshi kúni. Soǵan oraı, QR Memlekettik qyzmet isteri jáne sybaılas jemqorlyqqa qarsy is-qımyl agenttigi «Úzdik memlekettik qyzmetshi» respýblıkalyq konkýrsyn ótkizgen bolatyn. Baıqaýdyń mańyzdy maqsattarynyń biri - Memlekettik qyzmet bedelin arttyrý, memlekettik basqarýdyń úzdik tájirıbesin taratý, Qazaqstan Respýblıkasynyń úzdik kásibı bilimderi men daǵdylaryna ıe memlekettik qyzmetshilerin anyqtaý, kótermeleý jáne olardy yntalandyrý. «Úzdik memlekettik qyzmetshini» anyqtaý maqsatynda 9 adamnan turatyn konkýrstyń kommıssııasy da quryldy.

 Komıssııa quramyna memlekettik organdardyń basshylyǵy, sondaı-aq Prezıdent Ákimshiliginiń, Premer-Mınıstri Keńsesiniń ókilderi, Parlament palatalarynyń depýtattary, «Atameken» Ulttyq kásipkerler palatasy, halyqaralyq, qoǵamdyq, ǵylymı jáne bilim berý uıymdarynyń ókilderi endi.