Úzdik qaraǵandylyq órt sóndirýshiler marapattaldy
QARAǴANDY. QazAqparat - Qaraǵandy oblysy TJD Órt sóndirý jáne apattyq-qutqarý jumystary qyzmetiniń basshysy men eki qyzmetkeri Otan qorǵaýshylar kúnine oraı memlekettik nagradalarǵa ıe boldy, dep habarlaıdy QazAqparat tilshisi.
Aqordada QR Prezıdenti Qasym-Jomart Toqaev qaraǵandylyq Aleksandr Mınaevqa «Erligi úshin» medalin tabys etti. №1 órt sóndirý bóliminiń bólimshe komandıri, azamattyq qorǵaý starshınasy kóp qabatty úıdegi órt kezinde eki balany qutqarǵan.
Tótenshe jaǵdaı osy jyldyń naýryz aıynda Qaraǵandy qalasyndaǵy Reznık kóshesindegi turǵyn úıde boldy. Úıdiń kireberisi qoıý tútinge oranǵanyn kórgen Aleksandr Mınaev baspaldaqpen kóterilip, úshinshi qabattaǵy balkonnan sábılerdi tómenge túsirgen. Ol 10 jyldan astam azamattyq qorǵaý organdarynda qyzmet etip keledi jáne osy jyldar ishinde ózin úzdik qutqarýshy retinde kórsete bilgen.
QR ІІM Tótenshe jaǵdaılar komıtetinde eki qaraǵandylyqqa oblystyq TJD órt sóndirý jáne apattyq-qutqarý jumystary qyzmetini bastyǵy Ivan Komarovqa jáne Qaraǵandy qalasynyń №7 órt sóndirý bóliminiń júrgizýshisi Baqytjan Sádýovqa nagrada tabystaldy. Ivan Komarov ІІ dárejeli «Aıbyn» ordenimen, Baqytjan Sádýov «Erligi úshin» medalimen marapattaldy.
Qyzmet basshysy men qatardaǵy qyzmetker tótenshe jaǵdaılarda, aýrýhanada jáne bıik ǵımarattady órt sóndirý kezinde ózderin úzdik qutqarýshylar retinde kórsete bilgen. Baqytjan Sádýov janyp jatqan kópqabatty úıdiń segizinshi qabatynda adamdardy baıqap, qutqarý operatsııasyn uıymdastyryp, oǵan ózi qatysqan. Júrgizýshi eki balany tómen túsirip, aman alyp qalǵan.
Ivan Komarov professor H. J. Maqajanov atyndaǵy oblystyq travmatologııa jáne ortopedııa ortalyǵyndaǵy órt kezinde qol astyndaǵylardyń jumysyn basqaryp, jeke quramdy sheber jumyldyra bilgen. Saýatty uıymdastyrylǵan is-áreketterdiń arqasynda eshbir adam zardap shekken joq.
