Úzdik boks tóreshileri marapattaldy
ASTANA. QazAqparat - Qazaqstan Boks federatsııasy elimizdiń úzdik boks tóreshilerin marapattady, dep habarlaıdy QazAqparat.
Federatsııa málimetinshe, Búkilálemdik boks akademııasynda ótken saltanatty shara barysynda 2017 jyldyń úzdik tóreshisi ataǵyna Erjan Ospanbaev ıe boldy. Al Qaırat Jumanqulov úzdik referı, Natalıa Tsoı halyqaralyq arenadaǵy úzdik tóreshi atandy.
Aıta keterligi, búginde Qazaqstanda Halyqaralyq boks qaýymdastyǵynyń eń joǵary sanaty «3 juldyzǵa» ıe 9, «2 juldyzǵa» ıe 10 jáne «1 juldyzǵa» ıe 15 tóreshi bar. Halyqaralyq deńgeıdegi tóreshilerden bólek ulttyq arbıtrlar men deńgeıin kóterýge umtylatyn ózge de sanattaǵy tóreshiler jetkilikti. Olar úshin ótken jyly 2 semınar men 3 attestatsııa ótkizilgen bolatyn. Al bıyl mundaı sharalardyń qatary odan da kóp bolmaq.
«Bizdiń aldymyzda halyqaralyq týrnırlerdi tórelik etetin tóreshilerdiń deńgeıindegi jas tóreshilerdiń býyn ósirip shyǵarý mindetti tur. Aǵymdaǵy jyldyń ishinde tájirıbeli tóreshilerimizdiń, halyqaralyq deńgeıdegi sheteldik mamandardyń qatysýymen semınarlar, attestatsııalar ótkiziletin bolady. Ádiletsiz tórelik jasady dep shaǵymdanyp jatamyz. Biraq, semınarlar men attestatsııalar barysynda problemalar bilinip jatyr. Negizgi problema -tóreshilerimizdiń kópshiliginiń biliktiligi tómen», - dedi Qazaqstan Boks federatsııasynyń vıtse-prezıdenti Baýyrjan Ospanov.
Onyń paıymynsha, tóreshiler óńirlerge bólinbeýi tıis jáne olar jershildikke salynbaýy tıis.
«Eń úzdikter ǵana Qazaqstan quramasynyń sapyna kirýi qajet. Óıtkeni, halyqaralyq týrnırlerde, álemdik arenalarda olar oblystyń ne bolmasa aýdannyń emes Qazaqstannyń namysyn qorǵaıdy. Sondyqtan jyl boıy árbir týrnırden keıin ball qoıyp, qorytyndysynda úzdik tóreshini anyqtadyq. Olardy saltanatty túrde marapattadyq», - dedi ol.
