«Ýzbekkıno» Qazaqstanmen birlese fılmder túsirýge ázir
TAShKENT. QazAqparat - «Ýzbekkıno» ulttyq agenttigi bas dırektorynyń orynbasary Shýhrat Rızaev Qazaqstannyń Ózbekstandaǵy Elshisimen kezdesýde qazaqstandyq kınematografıstermen birlese otyryp, kóptegen jobalardy júzege asyrý qajettigin aıtty, dep habarlaıdy «QazAqparat» HAA-nyń menshikti tilshisi.
«Bizdi Qazaqstanmen ortaq tarıh pen mádenıet baılanystyrady, sondyqtan da kınematografııa salasynda ortaq jobalardy iske asyrýǵa tıistimiz. Qazaqstanda ózbek fılmderin unatady, Ózbekstanda da qazaq kınosyna yntyq bolǵandar kóp. Elińizde álemdik deńgeıdegi, óte sapaly fılmder shyǵarylyp jatyr», - dedi Shýhrat Rızaev.
«Ýzbekkıno» dırektorynyń orynbasary osy ıdeıany iske asyrý úshin eki eldiń stsenarısteriniń, kınorejısserleriniń, operatorlarynyń qatysýymen shyǵarmashylyq toptar qurý qajettigin tilge tıek etti.
«Qazaqstanda aǵymdaǵy jyl Ózbekstan jyly dep ataldy. Osynyń negizinde Ózbekstanda Qazaqstan kınosy kúnderin uıymdastyrýǵa bolady», - deıdi ol.
Kezdesý qorytyndylary boıynsha taraptar derekti, kórkem-pýblıtsıstıkalyq jáne kórkem fılmder baǵyttaryndaǵy jobalardy iske asyrý boıynsha birlesken jol kartasyn jasaý josparyn qurdy.
