Uzaqqa sozylǵan jańǵyrtý: Atyraýdaǵy «Sýdoremontnık» stadıony match ótkizýge ruqsat aldy
ATYRAÝ. KAZINFORM – Atyraýdaǵy «Sýdoremontnık» stadıony Qazaqstan fýtbol federatsııasynyń talaptaryna sáıkestigin rastap, Qazaqstan Premer-lıgasynyń matchtaryn ótkizýge ruqsat aldy. Buǵan deıin nysandaǵy jańǵyrtý jumysy belgilengen merzimnen keshigip, stadıonnyń daıyndyǵyna qatysty másele kóterilgen edi.
Bıyl qyrkúıektiń ortasynda stadıondaǵy negizgi qurylys jumysy shamamen 90 paıyzy aıaqtalǵanyn habarladyq. Jumys kestesiniń buzylýyna minbeler men metall konstrýktsııalardy daıyndaıtyn Reseı zaýytynan tapsyrystyń kesh jetkizilýi sebep bolǵan. Joba jetekshisi tapsyrysty oryndaýǵa kelisimshartta kózdelgen merzimnen eki ese kóp ýaqyt ketkenin aıtqan.
«Atyraý» FK taratqan aqparatqa súıensek, stadıon lıtsenzııalaýdan sátti ótip, Qazaqstan Premer-lıgasynyń oıyndaryn qabyldaýǵa ruqsat alǵan.
Endi «Atyraý» fýtbol klýby «Sýdoremontnık» stadıonyn Dene shynyqtyrý, sport jáne týrızm basqarmasynan jalǵa aldy. Klýbtyń málimetinshe, arenanyń syıymdylyǵy 3 020 orynmen shektelgendikten, matchtarǵa bılet satý kórermenderdiń qaýipsizdigin qamtamasyz etý jáne stadıonǵa kirýdi retteý maqsatynda uıymdastyrylady.
Bılet baǵasy 1 000–1 500 teńge aralyǵynda bolmaq.
Aıta keteıik, «Atyraý» klýby qazan aıynda óz alańynda «Elimaı» jáne «Ertis» komandalaryn qabyldaýy kerek.
Eske salaıyq, Atyraýlyq jas fýtbolshylar bıyl Freedom QJ League dodasynan dál osy alańnyń ýaqytynda daıyn bolmaýy saldarynan tys qalǵan edi.
Fýtboldan Qazaqstan áıelder quramasy álem chempıonaty joldamasyna talasatyny jóninde de jazǵan edik.
