Uzaqbaı Qarabalın: Qazaqstanǵa tórtinshi munaı óńdeý zaýyty kerek bolýy múmkin

ASTANA. 17 qyrkúıek. QazAqparat - Tórtinshi munaı óńdeý zaýytyn bolashaqta júzege asyrýdy qarastyryp jatyrmyz. Bul týraly búgin Úkimet otyrysynan keıin QR Munaı jáne gaz mınıstri Uzaqbaı Qarabalın atap ótti.

«Jańa munaı óńdeý zaýytyn iske qosý máselesi qaralyp jatyr. Zaýyttardyń óndiretin ónimderi bizdiń ındýstrııa men ekonomıkanyń damýyna baılanysty bolady. Baǵdarlamanyń damýyna oraı bolashaqta bizge tórtinshi zaýyttyń kerek bolýy múmkin. Ol másele qazir talqylanýda», - dedi mınıstr.

Bul turǵyda U. Qarabalın zaýyttyń qaı jerde ornyǵyp, qandaı mólsherde jumys isteıtini týraly tujyrymdy sheshim jasalmaǵanyn atap ótti.

«Elbasynyń bizdiń aldymyzǵa qoıǵan maqsattary óte joǵary. Janar-jaǵarmaımen qamtamasyz etý - ol bir bólek úlken másele. Sondyqtan da tórtinshi zaýyttyń bolashaqta júzege asyrylýyn biz qarastyryp jatyrmyz», - dep túıdi mınıstr.

Esterińizge sala keteıik, búginde elimizde Atyraý, Pavlodar jáne Shymkent munaı óńdeý zaýyttary bar.