Uzaq jyldar boıy belsendi bolý jónindegi birneshe qarapaıym keńes – mamandar
NUR-SULTAN. QazAqparat – Densaýlyq mınıstrligine qarasty «Qoǵamdyq densaýlyq saqtaý ulttyq ortalyǵy» RMK mamandary densaýlyqty qalaı saqtap, uzaq jyldar boıy belsendi bolyp qala berý kerektigi jónindegi birneshe qarapaıym keńespen bólisti, dep habarlaıdy QazAqparat.
Ulttyq ortalyq mamandary 1 qazan – Halyqaralyq qarttar kúnimen quttyqtaı otyryp egde jastaǵy adamdarǵa qajetti qarapaıym qaǵıdalardy eske sala ketti.
Deneni shynyqtyryp, belsendi bolý
Taza aýada kóbirek qydyryńyz. Dene shynyqtyrý jattyǵýy aǵzaǵa jaqsy áser etedi, qartaıý jyldamdyǵyn aıtarlyqtaı baıaýlatýǵa yqpal etedi, kúızelis jaǵdaıyn jeńýge kómektesedi. Jaımen júrýdiń ózi adamdy sharshata qoımaıdy, zat almasýdy, qan aınalymyn, tynys alýdy jaqsartady, bulshyq etterdi jattyqtyrady. Júrý kezinde júıke júıesi demalyp, adam sergip qalady.
Durys tamaqtaný
50-60 jastan keıin aǵzada fızıologııalyq ózgerister bolady – zat almasý baıaýlaıdy, ishektiń jıyrylýy álsireıdi, fermentterdiń belsendiligi tómendeıdi. Eń bastysy, tamaqty az ishý kerek, biraq nárli zattar kóbirek bolýy qajet. Etti jeı bermeı, balyq, sút, ásirese qyshqyl sút ónimderin (aıran, ıogýrt) kóbirek paıdalaný kerek. Kúnine 300-400 ml sút jáne túnge qaraı 200 ml aıran ishýdi usynamyz.
Tynysh uıqy
Durystap, qatty uıyqtaý úshin durys kún tártibi qajet: bir ýaqytta uıyqtaý, keshki asty uıqyǵa deıin 2-3 saǵattan keshiktirmeı jeý, kóp jemeý kerek. Uıyqtar aldynda taza aýada qydyrǵan durys. Uıyqtar aldynda óte áserli teledıdar habaryn kórýge, aǵzany sergitetin sýsyndardy – qoıý shaı, kofe ishýge bolmaıdy.
Jaǵymdy emotsııa kóbirek bolsyn
Jaǵymsyz emotsııalar: renish, úreı, sary ýaıymǵa salyný, ashý-yza, qaıǵyrý, qyzǵanysh, jek kórý qaýip-qater faktorlary bolyp sanalady, tezirek qartaıtyp, ómirdi qysqartady.Jjaǵymdy emotsııalar kerisinshe – rahattaný, qýaný – aǵzanyń qýat alýyna kómektesedi. Kúlki – bul qýanýdyń, sergek kóńil-kúıdiń jáne rýhanı densaýlyqtyń belgisi. Ol ókpeniń qalypty jumys isteýine jaqsy yqpal etedi, zat almasýdy retteıdi.
Profılaktıkalyq tekserýden, skrınıngten ýaqytyly ótý
Skrıng tekserý arterııalyq gıpertonııany, júrektiń ıshemııalyq aýrýyn, qant dıabetin, glaýkomany, onkologııalyq aýrýlardy ýaqytyly anyqtaýǵa múmkindik beredi. Siz skrınıng týraly aqparatty emhanadaǵy dárigerińizden bile alasyz.
Bul qaǵıdalardy saqtaý sizderge belsendi bolýǵa, densaýlyǵyńyzdyń myqty bolýyna jáne uzaq jyldar boıy denińizdiń saý bolýyna kómektesedi!
