Uzaq ýaqyt eski derekter paıdalanylǵan: ShQO joldary tsıfrlandyrylyp jatyr
ÓSKEMEN. KAZINFORM – Shyǵys Qazaqstan oblysynda kólik joldaryna tsıfrlyq pasporttar rásimdelip, jol jabynynyń jaı-kúıine naqty dıagnostıka júrgizilip jatyr.
Bul jumystar eldegi barlyq jol týraly aqparatty biriktiretin e-Joldar biryńǵaı derekter bazasyn iske qosýǵa daıyndyq aıasynda júzege asyrylyp keledi.
Óńir úshin bul asa mańyzdy qadam. Osyǵan deıin jol jelisiniń jaǵdaıy týraly uzaq jyldar boıy sońǵy derekter paıdalanylmaı kelgen. Kóptegen tasjoldardyń múlde pasporty bolmady. Al joldardyń uzyndyǵy, tozý deńgeıi men aqaýlary jónindegi málimetter shynaıy jaǵdaımen jıi sáıkes kelmeıtin. Endi bul tásil túbegeıli ózgerip otyr. Ár joldyń ózine tán tsıfrlyq derekteri qalyptastyrylmaq.
Qazirgi tańda Shyǵys Qazaqstanda jalpy uzyndyǵy 990 shaqyrymdy quraıtyn oblystyq mańyzdaǵy kólik joldary boıynsha pasportızatsııalaý jáne dıagnostıkalaý jumystary ishinara aıaqtalǵan. Aqparat formaldy túrde emes, aspaptyq ólsheýler men zamanaýı tsıfrlyq tehnologııalar negizinde jınaqtalyp jatyr.
Óńirde jasandy ıntellektke negizdelgen Smart Road Diagnostic System jol jabyndysyn dıagnostıkalaý júıesi qoldanylady. Bul júıe joldaǵy aqaýlardy anyqtap, tozý deńgeıin tirkep, problemaly ýchaskelerdi birden tsıfrlyq kartada kórsetedi. Munyń ózi trassalardyń tek qazirgi jaǵdaıyn ǵana emes, olardyń ary qaraıǵy paıdalaný merzimin boljaýǵa da múmkindik beredi.
– Tsıfrlandyrý bizge joldardyń jaı-kúıin jaı ǵana kózben kórý úshin emes, naqty ári ólshenetin derekter alýǵa jol ashady. Biz problemaly ýchaskelerdi, tozý deńgeıin kórip, tıisti sheshimderdi aldyn ala qabyldaı alamyz. Bul sapany baqylaý men jóndeý jumystaryn josparlaýdy túbegeıli ózgertedi, - dedi Jol aktıvteri ulttyq sapa ortalyǵy ShQO fılıalynyń ınjeneri Darhan Muratbek.
Jınalǵan barlyq derekter e-Joldar biryńǵaı platformasynyń kiriktiriledi. Bul jol ınfraqurylymyn basqarýǵa arnalǵan ulttyq tsıfrlyq júıe. Ol KazToll, ERAP jáne Smart Road Diagnostic System sekildi qoldanystaǵy servıstermen biriktirilip, aqyly jáne aqysyz jol ýchaskeleriniń barlyǵyn qamtıdy.
Aıta keteıik, e-Joldar platformasyn iske qosý 2026 jyldyń birinshi jartysyna josparlanǵan.
Eske salsaq, osyǵan deıin Aqtóbede jolǵa tóselgen qıyrshyq tastan emes, qumnan synama alynatyny jaıly jazǵanbyz.