Uzaq sapardan sharshadyq dep syltaý etpeımiz — «Real Madrıd» bapkeri Habı Alonso

ALMATY. KAZINFORM — «Real Madrıd» fýtbol klýbynyń bas bapkeri Habı Alonso «Qaıratqa» qarsy ótetin oıynǵa qatysty pikir bildirdi.

Onyń aıtýynsha, «Real Madrıd» aldaǵy matchta tek jeńiske jetýge nıetti jáne barlyq máseleni birinshi taımda sheshýge tyrysady.

— Biz jeńgimiz keledi. Oıyndy jaqsy bastaý mańyzdy. «Atletıko Madrıdke» jeńilgennen keıin biz bárin taldadyq. Jetistikke jetý úshin oıyn qarqyny mańyzdy, ol úshin nemquraılyq tanyta almaımyz. Barlyǵyn taldap, endi Chempıondar lıgasyndaǵy oıynǵa daıynbyz. Bizdiń maqsatymyz — jaqsy oınap, qysym kórsetip, shabýyldaý. «Qaıratpen» oıyn qarqyndy bolatynyn túsinemiz. «Qaırat» — taktıkasy da, uıymdasýy da myqty komanda. Olardyń «Seltıkke» jáne «Sportıngke» qarsy oıyndaryn kórdik. Jaqsy uıymdasqan, kombınatsııalyq fýtboldy qoldanady. Biraq sonymen birge «Qaırattyń» fýtboly birbetkeı ári túsinikti, — dedi Habı Alonso.

Onyń sózinshe, buǵan deıin ol «Qaıratty» bilmegen. Alaıda keıingi kúnderi beınejazbalaryn kórip, almatylyq komandanyń kóptegen oıynshysymen jaqsyraq tanysqan.

— «Qaıratpen» matchta bizdi alańdatatyn tustar bar, óıtkeni olar irikteý kezeńinde «Seltıkti» súrindirdi. «Sportıngke» iri eseppen utylǵan oıynda da qaýipti sátteri boldy. Erteń olar óz alańynda oınaıdy, «Qaırattyń» daıyn bolatynyna kúmán joq. Biraq biz sapardan sharshadyq dep syltaý etpeımiz. Biz jaqsy oınaýǵa daıynbyz, — dep sendirdi Habı Alonso.

Eske salaıyq, buǵan deıin «Real Madrıd» Almatyǵa kelgenin jazǵanbyz. 

Sonymen qatar Almatydaǵy «Real Madrıd» oıynshylary jatqan qonaqúı mańynan fotoreportaj jasaǵan edik.