Uzaq ómir súrý ortalyǵyna keletin balqashtyqtardyń sany ósýde
BALQASh. QazAqparat – Balqash qalasynyń belsendi uzaq ómir súrý ortalyǵy qala turǵyndary arasynda óte tanymal. Munda 7 myńnan astam qart adamdar bos ýaqyttaryn ótkizedi, dep habarlaıdy QazAqparat tilshisi.
Ortalyq qalalyq ardagerler Keńesi janyndaǵy «Ardager» klýbynyń bazasynda ashyldy. Kelýshiler úshin qyzyǵýshylyq klýbtary uıymdastyrylǵan, merzimdi basylymdar kitaphanasy jumys isteıdi.
Erler doıby men shahmat oınaıdy. Áıelder qolónerge kóbirek kóńil bóledi. Ortalyqta toqý, bısermen kesteleý boıynsha sheberlik sabaqtary ótkiziledi, dástúrli qazaq tigin tehnıkalaryn jáne zergerlik buıymdardy daıyndaýdy úıretedi.
Zeınetkerlerdi dene shynyqtyrýǵa baýlýǵa úlken kóńil bólinedi.
«Sport zalyn ashqymyz keledi. Jabdyqtardyń jetkizilýin kútýdemiz. Júgirý joly, gımnastıkalyq kilemsheler, skandınavııalyq júrýge arnalǵan taıaqtar bolady. Jaqynda shahmat pen doıbydan týrnır ótti. Ortalyqqa kelýshilerdiń biri – 86 jastaǵy Balqashtyń Qurmetti azamaty Beken Tóleýov jarystyń tóreshisi boldy. Ulttyq sport túrlerinen jarystar ótkizý josparda bar. Árıne, bul egde jastaǵy adamdar úshin qolaıly», – deıdi ortalyq basshysy Qarlyǵash Túsipbek.
Sondaı-aq shyǵarmashylyq baıqaýlar, merekelik is-sharalar ótkiziledi. Ortalyq qyzmetkerleri Balqash murajaıynyń qyzmetkerlerimen birlesip ekskýrsııalyq týrlar uıymdastyrady. Zeınetkerler Bektaý Ata shatqalynda, Temirtaý jáne Spassk qalalarynda, Dolınka kentiniń saıası qýǵyn-súrgin qurbandaryn eske alý murajaıynda boldy. Kóptegen ardagerler alǵash ret kórikti jerler men qasıetti jerlerdi kórdi.
«Bizdiń ortalyqqa barlyq nıet bildirýshilerdi shaqyramyz. Kóbisi zeınetke shyǵady jáne budan ári ne isteý kerektigin bilmeıdi. Bizde qarym-qatynas ornatyp, qyzyqty is-sharalarǵa qatysýǵa bolady. Ortalyǵymyzda eshqashan zerikpeısizder», – deıdi Qarlyǵash Túsipbek.
