Uıymdastyrýshy talaptardy oryndamaǵandyqtan, kontsert ótpeıtin boldy - MTEX management
NUR-SULTAN. QazAqparat - Búgin «Barys-Arenada» kontsert ótkizýdi josparlaǵan uıymdastyrýshy kompanııa kelisimshartta kórsetilgen talaptardy oryndamaǵandyqtan, oǵan ruqsat berilmeıtini jóninde jazbasha eskertilgen. Bul týraly «Mtex management» JShS bas dırektory Ashat Muqashev málim etti, dep habarlaıdy QazAqparat.
«Zhan Alem Group» JShS (ári qaraı – uıymdastyrýshy) 8 mamyrda «Barys-Arenada» kontsert ótkizbekshi boldy. Kelisimshartqa sáıkes, uıymdastyrýshy shara ótýge 6 jumys kúni qalǵanda, ıaǵnı 28 sáýirde qoǵamdyq qaýipsizdikti qamtamasyz etý maqsatynda is-sharany uıymdastyrý jáne ótkizý tártibi men sharttary týraly naqty aqparat berýi tıis edi.
«Barys-Arena» basqarýshy kompanııasy 27 jáne 29 sáýirde eskertýlerdi joıý qajettiligi týraly jazbasha túrde habarlady. Kelisimshart talaptarynyń oryndalmaýyna, kelisý merzimderiniń buzylýyna, ruqsat berý qujattarynyń (onyń ishinde Nur-Sultan qalalyq PD-den) bolmaýyna baılanysty uıymdastyrýshyǵa kontserttiń ótkizilmeıtini týraly habarlama joldandy.
Sondaı-aq, «Mtex management» qala bıligine adamdardyń baqylaýsyz jappaı jınalýy jáne azamattardyń densaýlyǵy men múlki úshin qaýip-qater týyndaýy múmkin ekenin habarlady, óıtkeni kontsertti uıymdastyrýshylar sharany resmı túrde toqtatqan joq. Qala bıligi bul jaǵdaıǵa jedel aralasty.
Barlyq múddeli taraptarmen túsindirý jumystary júrgizildi, qala turǵyndarynyń qaýipsizdigin qamtamasyz etý boıynsha sharalar qabyldandy», – dedi Ashat Muqashev.
8 mamyr kúni «Barys-Arena» saraıynda otandyq jáne reseılik estrada juldyzdarynyń qatysýymen kontsert ótedi degen aqparat – jalǵan ekenin «MTEX management» basqarýshy kompanııasy málim etti.
Keıin atalǵan kontserttiń ótetindigi týraly aqparattyń shyndyqqa janaspaıtynyn Nur-Sultan qalalyq ishki saıasat basqarmasy da rastady.
