Uıymdasqan qylmystyq toptar ekonomıkalyq salada shoǵyrlanǵan - Tileý Janǵarashev
ASTANA. QazAqparat - Uıymdasqan qylmystyq toptar ekonomıkalyq salaǵa ornyǵyp alǵan. Bul týraly QR Qarjy mınıstrligi Memlekettik kirister komıteti tóraǵasynyń orynbasary Tileý Janǵarashev málim etti, dep habarlaıdy QazAqparat.
«Uıymdasqan qylmystyq toptarǵa qatysty 50-den astam qylmystyq is tergeldi. 39 qylmystyq is sotqa baǵyttaldy. Osy oraıda kórsetkishter jyl saıyn turaqty bolyp keledi. Sonymen qatar bul kórsetkish Іshki ister mınıstrligi nátıjeleri deńgeıinde tur, ıaǵnı olar sotqa 54 qylmystyq isti joldady. Bul rette uıymdasqan qylmystyq toptar ekonomıkalyq salaǵa ornyqty túrde turaqtaǵany baıqalady. Sondyqtan da negizgi ekpin aýyr ári asa aýyr qylmystardy anyqtaýǵa qoıylyp otyr», - dedi Tileý Janǵarashev «Atameken» UKP janyndaǵy Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Onyń sózine qaraǵanda, ekonomıkalyq tergeý qyzmeti júrgizetin sotqa deıingi tergeý sapasy jaqsardy. Sonymen qatar keltirilgen zalaldy óndirip alý 28 paıyzǵa ósti.
