Uıymdasqan qylmystyq toppen jasalǵan qylmystarǵa jaza kúsheıtiledi

Búgin QR Parlamenti Májilisinde ««Qazaqstan Respýblıkasynyń keıbir zańnamalyq aktilerine uıymdasqan qylmysqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Qazaqstan Respýblıkasy Іshki ister mınıstriniń orynbasary Amantaı Áýbákirov osylaı málim etti.

ІІM orynbasarynyń aıtýynsha, atalǵan zań jobasy Memleket basshysynyń 2009 jylǵy 6 naýryzdaǵy Joldaýynda júktegen mindetterdi júzege asyrýǵa baǵyttalǵan. «Bul rette qujatta uıymdasqan qylmysqa qarsy kúrestiń jańa túri men tásilin engizý sharalary qarastyrylady. Olardyń áreket etýine jaǵdaı týǵyzatyn qarjy kózderin, bundaı qylmystarǵa memlekettik qyzmetkerlerdiń qatysýyn túp tamyrymen joıý kózdeledi. Budan bólek, uıymdasqan qylmys toptarymen, qylmystyq qaýymdastyqtarmen, sondaı-aq transulttyq qylmystyq toptarmen jasalǵan qylmystarǵa jazany qataıtý da qarastyrylady», - dedi Amantaı Áýbákirov.

Onyń aıtýynsha, zań jobasynda qylmystyq qaýymdastyqtarmen, transulttyq qylmystyq qaýymdastyqtarmen jasalatyn qylmystardyń uǵymdaryn naqtylaý tetikteri de qamtylyp otyr. Sonymen qatar bundaı qylmys jasaǵandarǵa olardyń múlkin tárkileý, shartty túrde bas bostandyǵynan aıyrýdy shekteý sekildi mindetti qosymsha jazalar kózdeledi. Uıymdasqan qylmystyq topqa, transulttyq qylmystyq toptarǵa kámeletke tolmaǵandardy tartýǵa qatysty jaýapkershilik te qataıa túsedi. «Uıymdasqan qylmyspen baılanysty qylmystar boıynsha balamaly tergeý engizý joldary da qarastyrylady», - deıdi ІІM orynbasary.