Uıymdasqan qylmystyq top quryp, reıderlikpen aınalysqan Eldos Qospaev Kıprde ustaldy - UQK

ASTANA. QazAqparat - Ulttyq qaýipsizdik komıteti 2023 jylǵy 6 qyrkúıekte júzege asyrǵan operatsııasynyń qorytyndysy boıynsha Soltústik Kıprden Qazaqstanǵa Eldos Qospaev jáne ol bastaǵan qylmystyq toptyń 7 múshesi jetkizildi.

Bul týraly QazAqparat QR Ulttyq qaýipsizdik komıtetiniń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, atalǵan adamdardy buǵan deıin Qazaqstan Respýblıkasy Qarjylyq monıtorıngi agenttigi reıderlik jasady, uıymdasqan qylmystyq topty qurdy jáne oǵan qatysty degen kúdikpen halyqaralyq izdestirýge jarııalaǵan bolatyn.

Tergeý málimetteri boıynsha, onyń músheleri qorqytý jáne zorlyq-zombylyq jasaý arqyly kásipkerlerdiń múlkin, olardyń kompanııalardaǵy úlesterin tartyp alǵan, sondaı-aq kóleńkeli bıznespen aınalysqan.

UQK operatsııasy sheńberinde sheteldik áriptestermen tyǵyz ózara is-qımyl jasaı otyryp, top qatysýshylarynyń ornalasqan jerlerin anyqtaý, sáıkestendirý jáne ustaý jónindegi qajetti jedel is-sharalar uıymdastyryldy.

«Kúdikti adamdar UQK «A» arnaıy maqsattaǵy qyzmetiniń jaýyngerleriniń aıdaýylymen Astana qalasyna jetkizildi jáne qylmystyq qýdalaý organynyń qyzmetkerlerine berildi»,-delingen UQK baspasóz qyzmeti taratqan aqparatta.

Osyǵan deıin Qospaev uıymdasqan qylmystyq toby múshelerin shekaradan ótkizgen turǵyn ustalǵany týraly jazdyq.