Uıymdasqan qylmysqa qarsy memlekettik tetikti kúsheıtetin zań jobasy Májiliske qaıtaryldy - Senat
TANA. 6 qazan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine uıymdasqan qylmysqa qarsy is-qımyl máseleleri boıynsha ózgerister men tolyqtyrýlar engizý týraly» QR zańynyń jobasyn ekinshi oqylymda qarap,
qujatty Májiliske qaıtardy.
Esterińizge sala keteıik, atalǵan zań jobasynyń negizgi maqsaty - qylmystyq uıymdasqan nysandaryna qarsy is-qımyldyń memlekettik tetikterin kúsheıtý, oǵan qarsy kúrestiń jańa nysandary men ádisterin engizý, qarjylyq kózderin, sondaı-aq oǵan memlekettik qyzmetshilerdiń qatysý faktilerin joıý bolyp tabylady. Sonymen qatar, zań jobasy múlikti tárkileý túrinde mindetti qosymsha jazalaýdy, shartty túrde sottaý, sharty túrde merziminen buryn bosatý sharalarynyń qoldanylýyn shekteýdi, kámiletke tolmaǵandardy uıymdasqan qylmysqa jáne transulttyq uıymdasqan qylmysqa tartqany úshin jaýapkershilikti qatańdatýdy kózdeıdi.
Senatorlar engizgen ózgeristerge kelsek, qujat boıynsha qylmysqa qatysýshylardyń jańa nysandarynyń uǵymdary BUU-nyń Transulttyq uıymdasqan qylmysqa qarsy konventsııasyna sáıkes keltirilip otyr. Budan bólek, «Jedel izdestirý qyzmeti týraly» zańǵa uıymdasqan top, qylmystyq qoǵamdastyq, transulttyq uıymdasqan top pen transulttyq qylmystyq qoǵamdastyq nemese turaqty qarýly top (banda) daıyndaıtyn nemese jasaıtyn qylmystar kezinde arnaıy jedel-izdestirý is-sharalaryn júrgizýge negiz beretin tolyqtyrýlar engizilgen. Sonymen qatar, taǵy birqatar túzetýler redaktsııalyq naqtylaý sıpatynda bolyp tabylady.
