Úısiz jandarǵa qymbat kólik rásimdegen: Elde adam saýdasyna qatysty 80-nen asa qylmys anyqtaldy
ASTANA. KAZINFORM — 30 shilde — Dúnıejúzilik adam saýdasyna qarsy kúres kúni. Bıylǵy is-sharalar «Alaıaqtyq tuzaǵynda» uranymen ótedi. Bul ınternet-alaıaqtyqqa májbúrleý sııaqty adam saýdasynyń jańa túrlerine nazar aýdarýǵa baǵyttalǵan.
QR Qylmystyq kodeksinde qanaýdyń barlyq túrleri úshin, sonyń ishinde májbúrli eńbekke tartý, seksýaldyq qanaý jáne qaıyrshylyqpen aınalysýǵa májbúrleý faktileri boıynsha qylmystyq jaýapkershilik kózdelgen. Aldyn alý sharalary nátıjesinde bıyl ishki ister organdary osy sanattaǵy 80 qylmysty tirkedi.
Sondaı-aq adam saýdasymen aınalysqan eki uıymdasqan qylmystyq toptyń zańsyz qyzmeti toqtatyldy.
— Mysaly, Almaty qalasynda adamdardy qylmystyq maqsatta paıdalanýmen aınalysqan uıymdasqan topqa qatysty sotqa deıingi tergep-tekserý bastaldy. Qylmystyq top turaqty turǵylyqty jeri joq adamdardy aldap-arbap, olardyń atyna Almaty jáne Shymkent qalalarynda qymbat avtokólikterdi rásimdep, keıin olardy satyp otyrǵan. Qazirgi ýaqytta qylmystyq toptyń negizgi uıymdastyrýshylary ustaldy. Tergeý jalǵasyp jatyr, — dedi QR ІІM Uıymdasqan qylmysqa qarsy kúres departamentiniń basqarma bastyǵy Samat Qusetov OKQ-da ótken dóńgelek ústelde.
Jezókshelikpen aınalysý úshin úı-jaı berý, jynystyq sıpattaǵy ózge de qyzmetter kórsetý nemese jeńgetaılyq faktileriniń jolyn kesý jumystary jalǵasty. Osy baǵytta 758 ákimshilik is tirkelip, quqyq buzýshylarǵa 213 mıllıon teńgeden astam aıyppul salynǵan.
Jumystyń tıimdiligin arttyrý úshin ІІM múddeli memlekettik organdarmen birlesip, sotqa deıingi tergep-tekserý protsesterin ǵana emes, quqyqtyq baza qurýdy, adam saýdasy faktileriniń aldyn alýdy jáne anyqtaýdy uıymdastyrýdy qamtıtyn birqatar keshendi sharalardy júrgizip keledi.
Aıta keteıik, Syrtqy ister mınıstrligi shetelde adam saýdasynyń qurbany bolǵan qazaqstandyqtardyń sany resmı derekterden áldeqaıda kóp bolýy múmkin ekenin aıtyp otyr. Byltyr 40-tan astam qazaqstandyq shet elderde quldyqqa jegilgen.
