Úısiz júrgen áıel 6 adamǵa qyshqyl shashyp jiberdi
ASTANA. QazAqparat - Marselde úısiz júrgen áıel qaladaǵy dámhananyń birine kelgenderge tuzdy qyshqyl shashyp jibergen. Saldarynan alty adam kúıip qaldy, dep habarlaıdy Le Parisien.
Keleńsiz jaǵdaı Marseldegi Eski porttyń mańyndaǵy Unic dámhanasynda bolǵan.
Basylymnyń atap ótýinshe, barlyq zardap shekken jandar aýrýhanaǵa jetkizildi. Dárigerler olardyń qoldary, aıaqtary men betteri kúıip qalǵandyǵyn málim etken. Degenmen jaraqattar jeńil, zardap shekkenderdiń ómirine qaýip tónip turǵan joq.
Kelýshilerge qyshqyl quıyp jibergen áıel ustaldy. Úısiz-kúısiz júrgen jandy bul aýdan turǵyndary jaqsy biletinge uqsaıdy. «Onyń júıkesi juqarǵan»,-desedi olar.
Ázirge polıtsııa qylmystyń nelikten jasalǵandyǵyn anyqtaı alǵan joq.
