Úıirmelerge tólem jasaý «áleýmettik ámııan» arqyly júzege asyrylmaq

ASTANA. KAZINFORM — Elimizde sporttyq jáne shyǵarmashylyq úıirmelerge tólem jasaý «áleýmettik ámııan» qyzmeti arqyly júzege asyrylady. Bul týraly Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın aıtty. 

Onyń aıtýynsha, «áleýmettik ámııan» eGov aıasynda jumys isteıdi. Búginde ony mektep oqýshylary ystyq tamaq ishý úshin, memlekettik dárihanalarda dári-dármek satyp alý úshin qoldanady. Al bıyl bul joba taǵy da 10 memlekettik qoldaý sharasy kezinde qoljetimdi bolmaq.

— Bilim salasynda keńeıtemiz. Óıtkeni, ol jerde úlken áleýet kórip otyrmyz: mektepke deıingi jáne qosymsha bilim berý, sporttyq jáne mádenı sektsııalar boıynsha úıirmeler, — dedi ol Úkimet otyrysynan keıingi brıfıngte.

Birinshi vıtse-mınıstrdiń aıtýynsha, «áleýmettik ámııan» arqyly azamattyń naqty bir qoldaý sharasyn alǵanyn ne almaǵanyn tekserýge bolady.

— Tólem jaıynda aıtar bolsaq, balanyń sol kúni sektsııaǵa, úıirmege shynymen barǵany ne barmaǵany anyqtalady. Sol arqyly bıýdjet boıynsha esebi men oryndalǵan jumys aktisi avtomatty túrde qalyptastyrylyp, sol arqyly tólem ótedi, — dedi Rostıslav Konıashkın.

«Áleýmettik ámııan» tsıfrlyq servısi engizilgen sátten bastap azamattarǵa yńǵaıly tsıfrlyq formatta dári-dármek berý boıynsha 13 mln-nan astam qyzmet kórsetildi. 

Sonymen qatar taýarlyq gazǵa arnalǵan «áleýmettik ámııan» gazdandyrylǵan óńirlerdiń bárine taratylady.