Úıirmeler kóbeıdi, qamtý kórsetkishi nege tómen – Oqý-aǵartý mınıstrligi
ASTANA. KAZINFORM – Elimizde balalarǵa qosymsha bilim beretin uıymdar sany 2 jyl burynǵy kórsetkishke qaraǵanda 1 183-ke artty. Bul týraly Quryltaı depýtattarynyń saýalyna Oqý-aǵartý vıtse-mınıstri Jaıyq Sharabasovtyń jaýabynda aıtylǵan.
- Ulttyq bilim berý derekter qoryndaǵy (budan ári – UBDQ) málimetterge sáıkes, bıyl 25 qyrkúıekte respýblıkada balalarǵa arnalǵan 2 896 qosymsha bilim berý uıymy jumys isteıdi. Bul 2024 jylmen salystyrǵanda 1183 uıymǵa (2025 jyl – 2142, 2024 jyl – 1713) artyq. Qosymsha bilim berý uıymdary sanynyń ósýi jeliniń keńeıýin jáne balalar úshin qosymsha bilim berýdiń qoljetimdiligin kórsetedi. Onda 2,4 mln bala, onyń ishinde tegin úıirmelermen jáne sektsııalarmen 1,7 mln oqýshy qamtylǵan, - dedi ol.
Vıtse-mınıstrdiń dereginshe, qosymsha bilim berý uıymdarynda jáne jalpy bilim beretin mektepterde mynadaı jekelegen sanattaǵy 625 myń bala qosymsha bilim berýmen qamtyldy:
- jetim balalar men ata-anasynyń qamqorlyǵynsyz qalǵan 16,3 myń oqýshy;
- erekshe bilim berý qajettilikteri bar 73,8 myń oqýshy;
- qolaısyz otbasylardan shyqqan 6,8 myń oqýshy;
- kópbalaly otbasylardan shyqqan 100,9 myń oqýshy;
- az qamtylǵan otbasylardan shyqqan 427 myń oqýshy.
- 25 qyrkúıektegi jaǵdaı boıynsha balalardy qosymsha bilimmen qamtý kórsetkishiniń 61,6 paıyzǵa deıin tómendeýi ýaqytsha sıpatqa ıe jáne jańa oqý jylynyń bastalýyna baılanysty. Bilim berý uıymdarynda (balalarǵa arnalǵan qosymsha bilim berý uıymdary men jalpy bilim beretin mektepter) toptardy, úıirmeler men sektsııalardy jınaqtaý jalǵasyp, sabaq kesteleri naqtylanyp, bilim alýshylar kontıngenti qalyptastyrylyp jatyr. Qyrkúıek–qazan aılarynda úıirmeler men sektsııalarǵa balalardy qosymsha qabyldaý, bilim alýshylar kontıngentin qaıta bólý jáne UBDQ-daǵy derekterdi ózektendirý jumystary júrgiziledi. Sonymen birge,bilim berý uıymdarynyń barlyǵy UBDQ-ǵa málimetterdi engizý jáne olardy ózektendirý jumystaryn tolyq aıaqtaǵan joq. Osyǵan oraı aǵymdaǵy derekter balalardyń qosymsha bilimmen naqty qamtylýyn tolyq kólemde kórsetpeıdi, - dedi Jaıyq Sharabasov.
Buǵan deıin depýtat Shahmardan Baımanov 2030 jylǵa deıin árbir aýyl balasyna keminde bir tegin úıirme nemese sektsııaǵa naqty qoljetimdilikti qamtamasyz etetin keshendi jospar ázirleý qajettigin kóterip, Oqý-aǵartý mınıstrine saýal joldaǵan edi.
