Úıirli shegirtkemen kúres: bıýdjetten 8,1 mlrd teńge qarajat bólinedi
ASTANA. KAZINFORM – Bıyl elimizdiń birqatar óńirin shegirtkeler shabýyldap, egistik alqapqa qaýip tóndirip otyr. QR Aýyl sharýashylyǵy mınıstrligi ázirge shyǵynnyń joq ekenine sendirýde. Belgili bolǵandaı, Qazaqstan aýmaǵynda úıirli (azııalyq shegirtke, ıtalıandyq prýs jáne marokkalyq shegirtke) jáne saıaq shegirtke taralǵan. Bir ǵana saıaq shegirtkeniń shamamen 270-ten astam túri bar eken.
Úıirli shegirtkeniń jappaı kóbeıýi aýyl sharýashylyǵy jerleri men egistikterine úlken qaýip tóndirip otyr. Osyǵan baılanysty úıirli shegirtkege qarsy kúres sharalaryn uıymdastyrýdy Aýyl sharýashylyǵy mınıstrligi respýblıkalyq bıýdjet qarajatynan pestıtsıdterdi satyp alý, saqtaý, tasymaldaý jáne qoldaný qyzmetteri arqyly ortalyqtandyrylǵan túrde júzege asyrady. Bul týraly Ortalyq kommýnıkatsııalar qyzmetinde ótken brıfıngte QR Aýyl sharýashylyǵy vıtse-mınıstri Ermek Kenjehanuly aıtty.
«Úıirli shegirtkelerdi óńdeý jumystaryna bıýdjetten 8,1 mlrd teńge qarajat qarastyrylǵan. Onyń ishinde respýblıkalyq bıýdjetten 4,2 mlrd bólinse, Úkimettiń rezervinen qosymsha 3,9 mlrd teńge úlestiriledi. Bul qarajattyń barlyǵy zııankesterge qarsy preparattardy satyp alý jumystaryn uıymdastyrýǵa baǵyttalady», – dedi ol.
Al, saıaq shegirtkege qarsy kúres jergilikti bıýdjet qarajaty esebinen júrgiziledi. Sońǵy jyldary onyń taralý alańynyń óskeni baıqaldy: 2020 jyly – 514 myń ga, 2021 jyly – 626 myń ga, 2022 jyly – 975 myń ga.
2023 jyly óńdeý sharalary 1,6 mln ga alańda júrgizilse, bıyl el aýmaǵynda úıirli shegirtke tektesterdiń taralý boljamy 2,5 mln ga (Aqtóbede 784,4 myń ga, Qostanaıda 775 myń ga, al Túrkistan óńirinde 271 myń ga) qurap otyr.
