Úıretilgen ıt joǵalǵan adamdy qalaı izdep tabady
NUR-SULTAN. QazAqparat – Joǵalǵan adamdy izdeý protsesine qutqarý qyzmetimen qatar arnaıy úıretilgen ıt te tartylady. Osy oraıda úıretilgen ıttiń joǵalǵan adamdy qalaı izdeıtinin Nur-Sultan qalasy tótenshe jaǵdaılar departamenti jedel qutqarý jasaǵynyń qutqarýshysy, kınolog Nıkolaı Popov aıtyp berdi, dep habarlaıdy QazAqparat tilshisi.
«Búgingi «Qys – 2021» komandalyq-shtabtyq oqý-jattyǵýy aıasynda úıretilgen ıtterdiń de daıyndyǵy pysyqtalyp jatyr. Bizge úıretilgen ıttiń kómegimen joǵalǵan 2 balyqshyny izdep tabý tapsyrmasy berildi. Naqty búgingi oqý-jattyǵý boıynsha aıtsam, ıttiń jumysyna kóp kedergi boldy. Sebebi bul jerde adam kóp, tıisinshe ıis te ártúrli. ıAǵnı ıt shatasady. Degenmen Mırta (úıretilgen ıt) tapsyrmany oryndap shyqty, men jaqsy degen baǵa beremin. Bul ıt naqty dalalyq jerde joǵalǵan jáne apat kezinde ǵımarattyń astynda qalǵan adamdy izdep, tabýǵa úıretilgen. Bul nemis ovcharkasy 4 jasta, aty - Mırta», - dedi Nıkolaı Popov.
Onyń aıtýynsha, ıtter joǵalǵan adamdy izdeýge kúshik kúninen úıretiledi.
«Mysaly, dalada adam joǵaldy delik, ony izdegende adamdar shóptiń arasynan kórmeı, bilmeı qalýy múmkin. Al ıttiń ıis sezý qabileti jaqsy damyǵan, ıaǵnı adamdy kórmeı-aq, ıisi arqyly izdep taba alady. Bul jaǵdaıda qutqarýshynyń da biliktiligi arta túsedi. Óıtkeni, ıttiń kómegimen adamnyń qandaı tótenshe jaǵdaıǵa tap bolǵanyn jáne oǵan shuǵyl kómek kórsetýdi úırene túsedi. Úıretilgen ıttiń joǵalǵan adamdy izdep tabý ýaqyty ártúrli. Jaǵdaıǵa baılanysty keıde jarty saǵattyń shamasynda tapsa, keıde bir kúnniń ishinde taýyp jatady», - deıdi ol.
Sondaı-aq, maman úıretilgen ıttermen daıyndyq turaqty túrde ótip turatynyn aıtty.
Jáne búginde elordanyń tótenshe jaǵdaı qyzmetinde 8 úıretilgen ıt bar.
Aıta keteıik, búgin jáne erteń Nur-Sultanda tótenshe jaǵdaı qyzmetiniń qysqa daıyndyǵy pysyqtalyp jatyr.
