Úırek etinen shujyq jasaǵan: SQO-da zańsyz jumys istegen tseh anyqtaldy
ASTANA.KAZINFORM – SQO-da polıtseıler zańsyz shujyq óndiretin tsehty anyqtady, — dep habarlaıdy Polisia.kz.
Soltústik Qazaqstan oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel aqparatty tekserý barysynda Petropavl qalasyndaǵy Jambyl kóshesinde et ónimderin zańsyz óndiretin tsehty anyqtady. Uıymdastyrýshynyń aıtýynsha, ol úırek etin satyp alyp, ony óńdep, qaladaǵy bazarlarda saýdalaǵan.
Zańsyz óndiristi uıymdastyrǵan 41 jastaǵy qala turǵyny kásipkerlik qyzmetti zańsyz júzege asyrǵany úshin ákimshilik jaýapkershilikke tartyldy. Sonymen qatar veterınarııalyq ınspektsııa qyzmetkerleri ony veterınarııalyq normalardy buzǵany úshin jaýapkershilikke tartty.
Al óndiris júrgizilgen jaǵdaılardyń qaýipsizdigin baǵalaý sanıtarııalyq-epıdemıologııalyq baqylaý qyzmetkerleriniń quzyretine jatady.
Polıtseıler turǵyndardy azyq-túlik satyp alý kezinde muqııat bolýǵa, brendtik ónimderdi fırmalyq dúkenderden alýǵa jáne taýardyń zańdylyǵyn rastaıtyn qujattardy talap etýge shaqyrady.
Aıta keteıik, Shymkentte talapqa saı kelmeıtin jumyrtqa men 15,7 keli shujyq joıyldy.
