Úıinen kóshirilgen adamdar turyp jatqan aqtóbelik mektepter sabaqty onlaın ótedi
AQTÓBE. KAZINFORM — Aqtóbe oblysynda evakýatsııalyq beket dep tanylǵan jáne sýǵa ketken nemese sýǵa ketý qaýpi bar mektepterde sabaq qashyqtan uıymdastyrylady.
Aqtóbe oblystyq bilim basqarmasynyń basshysy Jaıyq Sultan 1 sáýirde oqý protsesiniń qalaı uıymdastyrylatynyn habarlady.
— Evakýatsııa pýnkteri retinde qyzmet etip jatqan bilim berý uıymdarynda oqý protsesi — qashyqtan, al basqa sý qaýpi tónbegen mektepterde sabaq qalypty jaǵdaıda ótedi, — dedi ol.
Qazirgi ýaqytta Aqtóbe oblysyndaǵy 32 bilim berý uıymynda sý tasqynynan zardap shekken turǵyndar ornalastyrylǵan.
Onda barlyǵy 3 myńnan astam adam bar bolsa, onyń teń jartysy — bala.
Sonymen birge sýǵa ketken jáne sýǵa ketý qaýpi bar mektepter tiziminde Oıyl aýdanynda 14, Temirde 5, Qobdada 6, Hromtaýda 2 mektep bar.
Eske salsaq, buǵan deıin Aqtóbe oblysy boıynsha Qobda, Oıyl, Áıteke bı, Muǵaljar, Temir aýdandary men Aqtóbe qalasynda tótenshe jaǵdaı jarııalandy.
