Úıinen ketip qalǵan aqmolalyq jasóspirim beıimdeý ortalyǵyna ornalastyryldy
KÓKShETAÝ. KAZINFORM - Aqmola oblysynda úıinen ketip qalǵan 13 jastaǵy qyz birneshe kúnnen keıin tabyldy. Polıtsııa jasóspirimdi kámelettik jasqa tolmaǵandardy beıimdeý ortalyǵyna ornalastyrdy.
Aqmola oblysy PD baspasóz qyzmetiniń málimetinshe, jasóspirim 11 qyrkúıekte úıinen ketip qalǵan. Al anasy 19 qyrkúıekte polıtsııaǵa habarlap aıtqan.
Belgili bolǵandaı, jasóspirim osyǵan deıin de úıinen birneshe ret ketip qalyp júrgen. Qyz ózin izdeıtinin bilip, boı tasalap júrgen.
«Jedel izdestirý sharasy barysynda jasóspirim aman tabyldy. Oǵan qatysty eshqandaı zańǵa qaıshy áreket jasalǵan joq. Ol óziniń qaıda bolǵandyǵyn jáne birneshe kún boıy qarajatsyz qalaı júrgenin aıtýdan bas tartty. Polıtsııa onyń shataq minezi jáne úıinen jıi ketip qalyp júrgenin eskerip, odan ári jumys isteý úshin Kókshetaý qalasynyń kámeletke tolmaǵandardy beıimdeý ortalyǵyna ornalastyrdy», - dedi vedomstvodan.
Aıta ketsek, budan buryn Aqmola oblysynda 11 synyp oqýshysy sabaqqa barmaı shahtadan altyn izdegenin jazǵan edik.
