«Úıime sý kirdi»: Aqtóbelik turǵyn qaıda bararyn bilmeı otyr

AQTÓBE. KAZINFORM – Aqtóbede sý sorý, burý jumystary júrgizilip jatqanymen, tańda bir úıge sý kirdi. 

Aqtóbe qalasynyń turǵyny Tatıana Chýbar 10 jyldan astam ýaqyttan beri Qarǵaly ózeni boıyndaǵy baý-baqsha ujymynda turady. Keıingi jyldary jeke turǵyn úı statýsyn alǵanymen, bıyl qarǵyn sý qaýip tóndirdi. 

- Túngi saǵat 2:00 shamasynda kúıeýim «sýǵa kettik» dep oıatty. Tursam aıaǵymnyń asty sýǵa toly eken. Birden balalardy kórshige apardyq. Kúıeýim nasos taýyp ákelip, sýdy sordy. Biraq sý azaıyp, qaıta tolyp qalyp jatyr. Qazir ǵana úıge adamdar kelip, sý sorýǵa kiristi. Nege kósheniń sýyn soryp júr, al bizdiń úıimiz sýda qaldy. Biz onyń sebebin de bilemiz. Aqjar aýylynda jańa jol salyp, sý sonda jınaldy. Biz qapqa qum toltyryp, barrıkada jasadyq. Ony bireý túnde ashyp jibergen, - dedi qala turǵyny Tatıana Chýbar.

Aqtóbe qalasy Almaty aýdanynyń ákimi Aslanbek Shúıinshalıevtiń aıtýynsha, sý sorý, qum tógý jumystaryna 7 tehnıka jumyldyrylǵan.

- Tańerteń ákimdikten adam baryp, vıdeoǵa túsirdi, akt jasady. Ol shyǵyndy óteý týraly surady. Ony komıssııa sheshedi. Jalpy Almaty aýdany boıynsha taǵy eki úıdiń kireberisine sý kirdi. Olarda ájethanasyndaǵy sý kóterilip ketken, - dedi Aqtóbe qalasy Almaty aýdanynyń ákimi Aslanbek Shúıinshalıev. 

Aqtóbe qalasy ákimi baspasóz qyzmetiniń habarlaýynsha, Aqjar turǵyn alabynan keletin dala sýynan qorǵaý úshin Jańa Qarǵalyǵa bóget salyndy. Búginge deıin bóget dala sýlaryn ustap turdy. 

- Jańa Qarǵaly turǵyndarynyń aıtýynsha, túnde belgisiz bireýler sol bógetti tehnıkamen ashyp jibergen. Osynyń saldarynan Jańa Qarǵalyǵa qaraı sý ketti. Saıajaıdaǵy úıdiń ishine sý kirdi. Úıi kepkenge deıin ýaqytsha pýnkke bara turý usynysy berildi, - dedi Aqtóbe qalasy ákimi baspasóz hatshysy Aıgúl Baımenova. 

Eske salsaq, Aqtóbe oblysynyń Temir aýdanynda 5 úıge, 25 aýlaǵa sý kirdi.