Úılestirý keńesi «Beıneý-Sekseýil» avtojoly qurylysynyń jobasyn EQDB jáne HQDB-nyń qarjylandyrýyn maquldady
ASTANA. KAZINFORM – Qazaqstan Premer-mınıstriniń orynbasary – Ulttyq ekonomıka mınıstri Serik Jumanǵarınniń tóraǵalyǵymen Halyqaralyq qarjy uıymdarymen (HQU) yntymaqtastyq jónindegi úılestirý keńesiniń otyrysy ótti. Bul týraly Úkimettiń baspasóz qyzmeti habarlady.
Jıynda qatysýshylar iri ınfraqurylymdyq jobalardy memlekettik kepildikpen júzege asyrý úshin Eýropalyq qaıta qurý jáne damý bankiniń (EQDB), Halyqaralyq qaıta qurý jáne damý bankiniń (HQDB), Azııa ınfraqurylymdyq ınvestıtsııalar bankiniń (AIIB) jáne Islam damý bankiniń (IDB) qarajatyn tartý máselesin talqylady.
Transkaspıı halyqaralyq kólik marshrýtynyń quramyna kiretin «Beıneý-Sekseýil» avtomobıl jolynyń qurylysyna erekshe nazar aýdaryldy. Memleket basshysynyń tapsyrmasy boıynsha jaqyn arada «Beıneý – Sekseýil» jáne «Bozoı – Shalqar» ýchaskelerin qosa alǵanda, jalpy uzyndyǵy 765 shaqyrym bolatyn jańa avtojol qurylysyn bastaý qajet. Kólik mınıstrligi tehnıkalyq-ekonomıkalyq negizdemeni aıaqtaý men qurylys jumysyn bastaý taıaý ýaqytqa josparlanǵanyn habarlady. EQDB men HQDB 800 mlrd teńgeden astam qarajat bólý nıeti týraly mandattyq hat jiberip, jobany qoldaýǵa daıyn ekenin rastady.
Sondaı-aq «QTJ» UK» AQ-nyń Transkazaqstandyq temirjol dálizin damytý jónindegi Transforming Rail and Connectivity in Kazakhstan (Middle Corridor Development) jobasyn HQDB jáne AIIB-men birlesip júzege asyrý máselesi talqylandy.
Islam damý bankimen arnaıy ekonomıkalyq jáne ındýstrııalyq aımaqtarda ınjenerlik-kommýnıkatsııalyq ınfraqurylym salý máselesi boıynsha yntymaqtastyq bólek qaraldy. Ónerkásip jáne qurylys mınıstrliginiń boljamy boıynsha qajetti ınfraqurylymmen qamtamasyz etý 2030 jylǵa qaraı óńdeý ónerkásibiniń Jalpy qosylǵan qunyna (JQQ) 6,1% ósim beredi.
Atalǵan ınfraqurylymdyq jobalardy júzege asyrý eldiń halyqaralyq tranzıttik dáliz retindegi áleýetin edáýir nyǵaıta túsýge múmkindik berip, ekonomıkalyq tartymdylyqty arttyrýǵa jáne iskerlik ortany damytýǵa eleýli úles qospaq.
Aıta keteıik, «Beıneý — Bozoı — Shymkent» qubyrynyń jyldyq qýaty 15 mlrd tekshe metrlik ekinshi jelisi salynady.