Úılerinen sebepsiz shyqqandar polıtsııa ýchaskesine jetkizildi - Atyraý
ATYRAÝ. QazAqparat –Atyraý oblysynda tótenshe jaǵdaı rejımi engizilgennen beri 180 adam ákimshilik jaýapkershilikke tartyldy. Onyń 67-si qamaýǵa alyndy, dep habarlaıdy QazAqparat.
Oblystyq Polıtsııa departamenti baspasóz qyzmetiniń málimetinshe, Atyraý qalasynyń kóshelerinde táýlik boıy kezekshilik atqarýǵa jedel toptar men jaıaý narıadtar jumyldyrylǵan. Karantınge baılanysty Atyraý qalasyna kirip-shyǵý faktilerin boldyrmaý maqsatynda Almaly, Besikti, Qaraózek jáne Qarabatan blokposttary mańaıyndaǵy aınalma joldardy patrýldeıtin arnaıy mobıldi toptar qurylǵan. Sondaı-aq, dron kómegimen irgeles aýmaqtarǵa baqylaý júrgizilýde.
«Sáýirdiń 7-sinen 8-ine, 8-inen 9-yna qaraǵan túnde kóshege sebepsiz shyqqany úshin polıtsııaǵa 70-ke jýyq azamat jetkizildi. Olarǵa qatysty QR Ákimshilik quqyqbuzýshylyq týraly kodestiń 476-babymen ákimshilik hattamalar toltyrylyp, materıaldar sotqa joldandy. Oblysta tótenshe jaǵdaı rejımin buzǵany úshin 180 adam ákimshilik jaýapkershilikke tartyldy. Onyń 67-si qamaýǵa alyndy», - dedi Polıtsııa departamentinen.
Sonymen birge, mas kúıinde patrýlge baǵynbaǵan 9 adamǵa qatysty QR Ákimshilik quqyqbuzýshylyq týraly kodekstiń 478-babymen hattamalar toltyrylǵan. Al, blokpostardy aınalyp ótpekshi bolǵan 21 árekettiń joly kesilgen. Onyń ishinde 13-i jeke avtokólikterimen aınalma joldarda anyqtaldy. Osy merzim ishinde oblys polıtseıleri 3 myńnan astam azamatqa túsindirý júrgizgen.
