Úılerin sý qıratqan aqtóbelikterdiń birqatary jańa úı salyp aldy
AQTÓBE. QazAqparat - Aqtóbedegi Qýraıly aýylynda qurylys jumystary qarqyndy júrip jatyr. Turǵyndardyń ózderi salyp bastaǵan úılerdiń alǵashqysy aıaqtalyp, búgin qonys toıyn toılady, dep habarlaıdy QazAqparat tilshisi.
Aqtóbedegi sý tasqyny kezinde baspanasyz qalǵan otbasylar jańa mekendegi qurylys jumystaryn bastap, keıbiri úı salyp aldy. 
«Úı qurylysyna jer berilip, qajetti materıaldar jetkizildi. Qurylys jumystaryn 15 kún júrgizip, aıaqtap aldyq. Óz qarjymyzdy da saldyq. Qurylys kezinde týǵan-týystarymyz kómektesti»,- dedi Ǵalymjan Ómirzaqov. Buǵan deıin Mahambetovka aýylynda turyp, kóktemgi sý tasqyny kezinde baspanasyz qalǵan Ómirzaqovtar otbasynda 10 jan bar. Otaǵasy temirjolshy. Qurylys kezinde ujym kómektestip, qoldaý kórsetken.
Biraq qurylys kezinde óz kúshine senip, jumystan bos ýaqytynda ǵana baspana salyp jatqan adamdar bar. Olar qurylysty tym baıaý júrgizip jatyr.
«Eni 5, uzyndyǵy 9 metr. Negizgi qurylys materıaly eni 4, uzyndyǵy 8 metrge eseptelip bergen edi. Qurylys jumystaryn tek kúıeýim men ulym jasaıdy. Ekeýi de bazarda arba súıreıdi, keıin kelip, úıimizdi salady. Kúnine 1-2 myń teńge tabysymyz bar. Ózim bala kútimimen úıde otyrmyn»,- dedi Aqnur Amanshına.
Sý tasqyny kezinde baspanasy qınap qalǵan aqtóbelikter jer telimin alǵan soń jańa úıdiń aýmaǵyn keńeıtip salyp jatyr. Biri qurylysty aıaqtap, qýanysh toıyn toılap jatsa, ekinshileri búgin irgetasyn qalady. Jospar boıynsha kúz kelip, qys túskenshe qurylysty aıaqtap, turǵyndar úılerine kirýi qajet. Al ınfraqurylymdardyń barlyǵyn, ıaǵnı, elektr toǵy, sý men gazdy jergilikti kommýnaldyq mekemeler tegin jetkizip berdi.
